Xaricdəki əmlakları müsadirə edilən azərbaycanlı məmurlar kimlərdir? - VİDEO

Son illər xaricdəki əmlakları müsadirə edilən azərbaycanlı məmurlar barədə video hazırladıq. Məlumatlar "azadlıq radiosu" və "meydan tv" media orqanları, Böyük Britaniyanın Milli Cinayət Agentliyi, Britaniya mətbuatından götürülüb.

 

2018-ci ildə Londonda korrupsiyaya qarşı mübarizə qanununun ilk hədəfi Azərbaycan Beynəlxalq Bankının həbsdə olan sədri Cahangir Hacıyevin həyat yoldaşı Zamirə Hacıyeva oldu. Londonda Hacıyevaya məxsus 11.5 milyon funt sterlinqə alınmış (15.13 milyon dollar) evin müsadirəsi gündəmə gəldi.

Böyük Britaniyanın ilk "McMafia-sayağı” çirkli pul istintaqının gedişində Zamira Hacıyevaya məxsus 400 min funt sterlinq dəyərində ziynət əşyaları müsadirə edilib. Bu barədə Böyük Britaniya mətbuatı yazır.

2021-ci ildə DJ Mikaela Jav’ın 4 milyon funt sterlinqi (5,5 milyon dollar) müsadirə edilib. Mikaela Javın  Cəlal Əliyevin qızı olan İzzət Xanım Cavadova olduğu az sonra açıqlandı. Onu və əri Süleyman Cavadov qeyri-şəffaf mənbələrdən 13,9 milyon funt sterlinq aldığı üçün İngiltərənin Milli Cinayət Agentliyi barələrində araşdırmaya başladı. Araşdırmalar sonrası  onların əmlakı müsadirə edildi. 

2022-ci ilin əvvəlində Azərbaycanın deputatı, Böyük Britaniya-Azərbaycan, Avropa İttifaqı-Azərbaycan Parlament Əməkdaşlıq Komitəsinin həmsədri Cavanşir Feyziyevin ailə üzvlərinə məxsus Britaniyanın bank hesablarındakı 5,6 milyon funt-sterlinqin müsadirəsi ilə bağlı qərar çıxarılıb. Böyük Britaniyanın Milli Cinayət Agentliyi (NCA) araşdırmalarından sonra Feyziyev hər hansı çirkli pulların yuyulmasında və qanunsuz fəaliyyətdə iştirakını  inkar edib.

 

İngiltərədə Kəmaləddin Heydərova məxsus çoxsaylı şirkətləri oğlanları Nicat və Taleh Heydərovların idarə etdiyi aşkarlanıb. Məlum olub ki, indiyədək Heydərov qardaşlarının adına İngiltərədə 12 şirkət və cəmiyyət qeydiyyatdan keçirilib. Lakin o şirkətlərin müsadirə edilib-edilməməsi barədə hər hansı rəsmi informasiya mətbuatda öz əksini tapmayıb. 
 

 

Hazırladı - Gülnar Nazimqızı, Ləman Qasımova