Rəsmi Bakı həbsdə olan şəxslərin azad edilməsinə çağıran diplomatlara qəzəblənib - VİDEO

Azərbaycan Xarici İşlər Nazirliyi, çərşənbə axşamı keçirilən bir tədbirdə diplomatların ölkənin insan hüquqları və söz azadlığı sahəsində vəziyyətinin son bir ildə daha da pisləşdiyini bəyan etməsindən bir neçə saat sonra reaksiya verib.

ABŞ-ın Azərbaycandakı səfiri Mark Libbi həbsdə olan insanların adlarını sadalayaraq Azərbaycan hökuməti  onların azad edilməsi istiqamətində danışıqların davam etdiriləcəyini bildirib. 

"Mən Azərbaycan hakimiyyətini bu şəxsləri və haqsız şəkildə həbs olunan digər şəxsləri azad etməyə, beynəlxalq insan hüquqları üzrə öhdəliklərini yerinə yetirməyə çağırıram," -  bildirərək səfir  Böyük Britaniya, İsveçrə və Avropa İttifaqının səfirlərinin oxşar bəyanatlarına dəstək verib.

"Bu bəyanatlar Azərbaycanda müstəqil məhkəmə sistemini zəiflətmək üçün açıq cəhddir", -  Azərbaycan Xarici İşlər Nazirliyi gecə saatlarında X platformasında buna  cavab verərək bildirib.

Nazirlik əlavə edib ki,  "istintaq prosesinə müdaxilə yolverilməzdir və məhkəmə prosesinə müdaxilə hüquq dövlətinin əsas prinsipi olan qanunun aliliyi prinsipinə ziddir".

Keçən ay keçirilən konfransa hazırlıq dövründə Azərbaycan Prezidenti İlham Əliyev ABŞ qanunvericilərinin insan hüquqları ilə bağlı vəziyyəti tənqid edən və siyasi məhbusların azad edilməsini tələb edən məktubunu "iyrənc" adlandırmışdı.

Çərşənbə günü insan hüquqları müdafiəçisi Rüfət Səfərov barədə dörd aylıq həbs qətimkan tədbiri seçilib. Onun vəkili bildirib ki, Səfərov Bakı məhkəməsində dələduzluq və xuliqanlıq ittihamlarını rədd edib və qərardan şikayət vermək niyyətindədir.

Keçmiş prokurorluq əməkdaşı  olan Səfərov, rüşvət ittihamı ilə üç il həbs cəzası çəkib, daha sonra Prezidentin əfv sərəncamı ilə 2019-cu ildə azadlığa buraxılıb.

 

Vəkil Elçin Sadıqovun  sözlərinə görə,  onun bir neçə gün ərzində insan hüquqları üzrə mükafat almaq üçün ABŞ-a getməsi planlaşdırılırdı.

ABŞ Dövlət Departamentinin sözçüsünün müavini Vedant Patel, çərşənbə axşamı Vaşinqtonda keçirilən brifinqdə Səfərovun həbsi ilə bağlı dərin narahatlıq ifadə edib.

"Biz Azərbaycanı haqsız yerə həbs olunan bütün şəxsləri azad etməyə və insan hüquqları müdafiəçiləri və jurnalistlər də daxil olmaqla, vətəndaş cəmiyyətinə qarşı təzyiqləri dayandırmağa çağırmağa davam edirik," -  Patel bildirib.