Azərbaycanlı dindar gənc qohumunu öldürdü, ibadət yeri yandırıldı

Gürcüstanın Qardabani rayonunun Sarticala (Muğanlı) kəndində qətl hadisəsi baş verib.

APA-nın Gürcüstan bürosunun məlumatına görə, dünən 30 yaşlı dindar Nüsrəddin Xıdırov həmkəndlisi, iki uşaq atası, 40 yaşlı Oruc Əmiraslanovu öldürüb.

Hadisə barədə APA-ya açıqlama verən Gürcüstan Müsəlmanları İdarəsinin rəhbəri, şeyx Ramin İgidov hadisənin dini zəmində baş vermədiyini bildirib: “Azərbaycanlıların kompakt yaşadığı Muğanlı kəndində toy məclisində şəxsi zəmində mübahisə düşüb, həmin kənddə yaşayan Nüsrəddin Xıdırov və Oruc Əmiraslanov arasında başlayan mübahisə zamanı bir qrup sakin qeyri-etik ifadələr işlədib. Sonra mübahisə toy evindən kənarda yerləşən, dindarların ibadət etdiyi yerdə davam edib. Mübahisə qızışan zaman bir qrup kənd sakini ibadət yeri üçün qurulan çardağı yandırıb. Yaranmış qarışıqlıqda Nüsrəddin Xıdırov aldığı zərbədən bayılıb. O, özünə gələn kimi bıçağa əl atıb. Qorxutmaq məqsədilə Oruc Əmiraslanova atdığı bıçaq onun ürək nahiyəsinə batıb. Yaralı xəstəxanaya aparılarkən yolda keçinib. Onlar qohum olublar. Hadisə barədə rayon polisinə xəbər verilib, polis əməkdaşları hadisəyə müdaxilə ediblər. Faktla bağlı cinayət işi başlanıb, istintaq gedir”.

GMİ rəhbəri hadisənin heç bir dini təriqət və cərəyanla əlaqəli olmadığını da bildirib. 

ANN.Az