Azərbaycanlı alimin ehtimalını amerikalılar sübut etdi

Amerikanın Harvard-Smitson Astrofizika Mərkəzinin alimləri martın 17-də mətbuat konfransı keçirərək elmdə "böyük kəşf" etdiklərini açıqlayıblar. ANS PRESS-in məlumatına görə, astrofiziklər Antarktikadakı BICEP2 rəsədxanasında toplanan göstəricilər ilk dəfə olaraq Böyük Partlayış nəticəsində yaranmış qravitasiya dalğalarının olmasını sübut edən birbaşa və «parlaq» dəlillər ortaya çıxarıb. Alimlər ilk dəfə olaraq 13,8 milyard il qabaq baş vermiş və məkan-zaman mövcudluğuna səbəb olmuş Böyük Partlayışın, yəni dünyanın yaranmasının ilkin qravitasiya dalğasının izlərini aşkarlaya biliblər. “Sky & Telescope” jurnalı yazıb ki, Amerika alimlərinin kəşfi onları Nobel mükafatına birbaşa namizəd edir. Qeyd edək ki, Azərbaycan alimi Elçin Xəlilov Kainatın mərkəzindən, yəni Böyük Partlayışın baş verdiyi nöqtədən yayılan qravitasiya dalğalarının olması barədə hələ xeyli qabaq yazıb. Elçin Xəlilov həm də Azərbaycan alimlərinə məxsus yeganə elmi kəşfin dörd həmmüəllifindən biridir. Digər həmmüəlliflərdən biri də mərhum akademik Şəfayət Mehdiyevdir. Dünya üzrə qeydə alınmış həmin kəşfdə Yerin ölçüsünün periodik olaraq dəyişdiyi, yəni Yerin periodik olaraq sıxıldığı və dartıldığı vurğulanır. Azərbaycan alimləri bunun həm də Yerdəki seysmik aktivlikə uyğun baş verdiyini ortaya çıxarıblar. Sonradan Elçin Xəlilov öz kitabında bunu Kainatın mərkəzindən gələn qravitasiya dalğaları ilə əlaqələndirib. Qravitasiya dalğalarının mövcudluğu dolayı yolla Eynşteynin nisbilik nəzəriyəsi ilə də sübut oluna bilər. Alim ehtimal edirdi ki, kütləsi olan istənilən cisim ətrafındakı fəzanı təhrif edir.ANN.Az