Prezident daha bir rektorla bağlı sərəncam verdi

Prezident İlham Əliyevin sərəncamı ilə Sumqayıt Dövlət Universitetinə yeni rektor təyin edilib. “Qafqazinfo” xəbər verir ki, Elxan Bahadur oğlu Hüseynov universitetə rektor təyin olunub. Xatırladaq ki, dekabrın 16-da Azərbaycan prezidentinin sərəncamı ilə Sumqayıt Dövlət Universitetinin rektoru Nadir Qəhrəmanov tutduğu vəzifədən azad olunmuşdu. Qeyd edək ki, nazir Mikayıl Cabbarov dekabrın 18-də Elxan Hüseynovun SDU-nun tədris işləri üzrə prorektoru vəzifəsinə təyin olunması ilə bağlı əmr vermişdi. "Qafqazinfo" yeni rektor haqda qısa informasiya təqdim edir: Elxan Bahadur oğlu Hüseynov Azərbaycan Dövlət Universitetinin mexanika-riyaziyyat fakültəsini bitirib. 1985-ci ildə Azərbaycan Dövlət Universitetində namizədlik dissertasiyasını müdafiə edib, 1994-cü ildə dosent elmi adı alıb. 1991-1995-ci illərdə Bakı Dövlət Universitetinin (BDU) fəlsəfə kafedrasının dosenti, 1995-ci ildən BDU-nun beynəlxalq əlaqələr üzrə prorektoru, 1999-2002-ci illərdə isə birinci prorektor - tədris işləri üzrə prorektor vəzifələrində çalışıb.2002-2010-cu illərdə Azərbaycan Respublikasının Türkmənistandakı fövqəladə və səlahiyyətli səfiri vəzifəsində fəaliyyət göstərib. 2010-2011-ci illərdə BDU-nun beynəlxalq əlaqələr üzrə prorektoru, 2013-cü ilin avqustun 15-dən isə təhsil nazirinin müşaviri vəzifəsində işləyib.ANN.Az