Qəzaya uğrayan təyyarə ilə bağlı yekun hesabat dekabra kimi təqdim olunacaq

Qazaxıstanın Aktauda qəzaya uğrayan sərnişin təyyarəsi ilə bağlı yekun hesabat bu ilin dekabrına kimi təqdim ediləcək. Bu barədə Qazaxıstanın nəqliyyat nazirinin müavini Talqat Lastayev bildirib.

Onun sözlərinə görə, Beynəlxalq Mülki Aviasiya Təşkilatının standartlarına görə, belə bir hadisənin təhqiqatı bir ildən çox çəkməməlidir. Müvafiq olaraq, istintaqla bağlı yekun hesabat 2025-ci ilin dekabrına qədər tamamlanmalıdır, deyə o, yekunlaşdırıb.

Dekabrın 25-də AZAL-a məxsus sərnişin təyyarəsi Qazaxıstanda qəzaya uğrayıb. Təyyarədə olan 67 nəfərdən 29 nəfəri sağ qalıb. 
 
Sərnişin təyyarəsi Rusiya tərəfindən vurulub. Rusiya prezidenti Vlodimir Putin baş verən qəzaya görə Azərbaycan Prezidentinə zəng edərək üzr istəyib. 
 
Baş verən qəzadan sonra dekabrın 26-da Azərbaycanda matəm günü elan edilib. 
 
Həmçinin qəzada olan 2 pilot və bir bələdçi Prezidentin sərəncamı ilə Milli Qəhrəman adını alıb. Qəzada sağ qalan digər iki bələdçi isə rəşadət ordeni ilə təltif olunub. 
 
Gülnar Nazimqızı