“QHT işi” üzrə daha iki nəfər həbs olunub

“QHT işi” çərçivəsində Gəncə Regional İcma Mərkəzinin rəhbəri Asəf Əhmədov və hüquq müdafiəçisi, sosial işçi Zamin Zəki cinayət məsuliyyətinə cəlb olunub. Binəqədi Rayon Məhkəməsinin qərarı ilə hər ikisi barəsində 3 ay 4 gün müddətinə həbs qətimkan tədbiri seçilib. Bu barədə onların vəkili Pərviz Hacıyev məlumat verib. 

Vəkilin sözlərinə görə, Əhmədov məhkəmədə özünü təqsirli bülmədiyini bildirib.

Baş Prokurorluğun İstintaq İdarəsində bir sıra yerli və xarici QHT-lərin fəaliyyəti ilə bağlı cinayət işi açılıb. İstintaq Cinayət Məcəlləsinin 192.2.2 (qanunsuz sahibkarlıq), 213.1 (vergi ödəməkdən yayınma), 308.2 (vəzifə səlahiyyətlərindən sui-istifadə) və digər maddələri üzrə aparılır.

Bu iş üzrə daha əvvəl “İştirak Evi” MMC-nin rəhbəri Məmməd Alpay (Məmmədzadə), “Benefisiar” Hüquqi Yardım Mərkəzi və Vətəndaş Hüquqları İnstitutunun rəhbəri Bəşir Süleymanlı və Sosial Hüquqlar Mərkəzinin rəhbəri Sübhan Həsənli təqsirləndirilən şəxs qismində tanınıblar. Onlardan ikisi həbs edilib, Sübhan Həsənli isə axtarışa verilib.

“Hüquq və İnkişaf” İctimai Birliyinin rəhbəri Hafiz Həsənov isə ev dustaqlığına buraxılıb. 

Tatyana Kryuçkina