MDB Oyunları və Formula 1 yarışları ərəfəsində təcili tibbi yardım sistemində hazırlıq gücləndirilib

Azərbaycanda yaxın həftələrdə keçiriləcək “Formula 1” və 3-cü MDB Oyunları ərəfəsində səhiyyə sistemində hazırlıq tədbirləri intensivləşdirilib. Bu barədə TƏBİB-in təşkil etdiyi müşavirədə məlumat verilib.

Respublika Təcili və Təxirəsalınmaz Tibbi Yardım Mərkəzinin direktoru Mirələm Cəlalov bildirib ki, beynəlxalq tədbirlərin uğurla keçirilməsi üçün tibbi təminatın gücləndirilməsi istiqamətində zəruri addımlar atılır.

“MDB Oyunları səhiyyə sistemimiz üçün növbəti ciddi sınaq olacaq,” – Cəlalov qeyd edib.

TƏBİB-in İcraçı direktoru Vüqar Qurbanov yarışların yalnız Bakıda deyil, həm də Gəncə, Mingəçevir və Sumqayıt şəhərlərində keçiriləcəyini nəzərə alaraq, təcili tibbi yardım qruplarının marşrutlar üzrə formalaşdırılması, növbətçilik qrafiklərinin tərtib olunması və hazırlıq vəziyyətinin operativ şəkildə təşkilinə dair müəssisə rəhbərlərinə göstəriş verib.

Müşavirənin sonunda tibb müəssisələrində aparılan yoxlamalar zamanı aşkar edilmiş nöqsanların aradan qaldırılması üçün aidiyyəti rəhbər şəxslərə konkret tapşırıqlar verilib və qısa müddətdə icrası tələb olunub.

Aytac Zeynalova