Şəmkirdə mikroavtobusun yük maşınına çırpılması nəticəsində 7 nəfər ölüb

Şəmkirdə “Mercedes” markalı mikroavtobusun yük maşınının qoşqusuna çırpılması nəticəsində azı 7 nəfər ölüb, 5 nəfər isə xəsarət alıb, bu barədə yerli media bildirib.

Qəza Bakı-Qazax magistral yolunun Dəllər Cəyir kəndi ərazisindən keçən hissəsində baş verib.

İlkin məlumata görə, mikroavtobus Ağstafa istiqamətində hərəkətdə olarkən “KAMAZ” markalı yük maşınının qoşqusuna arxadan çırpılıb.

Nəticədə, sürücü – 1966-cı il təvəllüdlü Arif Bağırov və onunla birlikdə avtomobildə olan 6 sərnişin hadisə yerində ölüb. Daha 5 nəfər müxtəlif dərəcəli bədən xəsarətləri ilə xəstəxanaya yerləşdirilib. Onlardan birinin vəziyyəti ağırdır.

Ölənlərin şəxsiyyəti müəyyənləşdirilib: Bayramov Şadət (1992), Bəsti Nəbiyeva (1975), Aydın Pənahov (1977, Bakı sakini), Qızxanım Tomayeva (1962), Kənan Məmmədov (2008), Fəxriyyə Novruzova (1978) və mikroavtobusun sürücüsü Arif Bağırov (1966).

Xəsarət alanlar arasında Şahniyar Pənahova (1975), Kamran Məmmədov (1969), Nərmin Əliyeva (2004), Məcid Qəribov (1995) və Bəkinaz Gözəlova (1970) var.

Faktla bağlı cinayət işi başlanıb, araşdırma aparılır.

Gülnar