BMT rəsmisi: Keyfiyyətli təhsil olmadan dayanıqlı gələcək mümkün deyil

Keyfiyyətli təhsilə sərmayə qoyulmadan dayanıqlı və ədalətli gələcək qurmaq mümkün deyil. Bunu BMT-nin Azərbaycandakı Rezident Əlaqələndiricisi Vladanka Andreeva Bakıda keçirilən "Azərbaycanın Dayanıqlı İnkişaf Naminə Təhsilə İnvestisiya" mövzusunda 7-ci DİM dialoqu forumunda bildirib.

Andreeva-nın sözlərinə görə, təhsil təkcə sosial prioritet deyil, həm də “irəliləyişin əsas aparıcı qüvvəsidir”.

O vurğulayıb ki, insanlar bugünkü çağırışlara cavab vermək üçün bilik və bacarıqlarla silahlanmalıdırlar.

Diplomat qeyd edib ki, Dayanıqlı İnkişaf Məqsədləri (DİM) üzrə 7-ci dialoq 4-cü məqsədə – keyfiyyətli təhsilə sərmayələrin artırılmasına həsr olunub.

“BMT artıq səkkiz ildir ki, hamı üçün sülh, firavanlıq və tərəfdaşlıq istiqamətində fəaliyyətini davam etdirir. Biz hökumətlərlə və müxtəlif tərəfdaşlarla birgə işləyirik”, –  Andreeva əlavə edib.

O həmçinin bildirib ki, DİM dialoqları müxtəlif maraqlı tərəfləri bir araya gətirən etibarlı platformaya çevrilib və bu təşəbbüs gələcəkdə də davam etdiriləcək.

Gülnar Nazimqızı