Toy məclislərində israfçılıq səviyyəsi kəskin artıb - Deputat

Son illər ölkədə toy məclislərində  israfçılıq səviyyəsi kəskin artıb. Bunu Milli Məclisin deputatı Razi Nurullayev dekabrın 16-da parlamentdə çıxışı zamanı deyib. 

Nurullayevin sözlərinə görə, şadlıq evlərində artıq qida tullantıları, geniş menyu çeşidləri, bahalı dekorasiya və əyləncə xərcləri adi hala çevrilib.

O qeyd edib ki, tonlarla ətin tullantıya çevrildiyi şəraitdə minlərlə ailənin ət almaqda çətinlik çəkməsi bu tendensiyanın sosial və iqtisadi ziddiyyətlərini üzə çıxarır.

Deputat bildirib ki, toy mərasimləri getdikcə sevinc və birlik məclisi olmaqdan çıxaraq sosial statusun nümayişinə çevrilir. Onun fikrincə, israfçılığın azaldılması yalnız maliyyə qənaəti deyil, eyni zamanda ictimai məsuliyyət məsələsidir.

Gülnar Nazimqızı