Sabiq nazirə artıq pensiya ödəndiyi üçün geri alınacaq

Azərbaycanın sabiq sənaye-energetika naziri, “AzərKimya” Dövlət Şirkətinin keçmiş prezidenti və Milli Məclisin III çağırış deputatı olmuş akademik Məcid Kərimovun pensiyasının yenidən hesablanması və artıq ödənilmiş vəsaitin geri tutulması məhkəmə tərəfindən qanuni sayılıb. Bu barədə Qafqazinfo yazıb. 

Məhkəmə materiallarına görə, Dövlət Sosial Müdafiə Fondu (DSMF) yoxlama zamanı Kərimova deputat fəaliyyəti ilə bağlı 4 226 manatın artıq ödənildiyini müəyyən edib. Araşdırmada bildirilib ki, Kərimov növbədənkənar seçkilərlə deputat seçildiyinə görə 5 illik tam səlahiyyət müddətini deyil, 4 il 5 ay 16 gün deputat olub.

DSMF-nin hesablamasına əsasən, əvvəlki səhv nəticəsində iddiaçıya aylıq 6 631 manat pensiya ödənilib, halbuki düzgün məbləğ 5 858 manat olmalı idi. Qurum artıq ödənilmiş məbləğin pensiyadan tutulmasına qərar verib.

Kərimovun vəkili qərarı əsassız hesab edərək bildirib ki, qanunvericilikdə deputat fəaliyyətinin tam və ya natamam anlayışı yoxdur və növbədənkənar seçkilərlə deputat seçilməsi fəaliyyətin natamam sayılması üçün əsas ola bilməz.

Məhkəmə tərəfləri dinlədikdən sonra DSMF-nin mövqeyini dəstəkləyib və pensiyanın yenidən hesablanması, eləcə də artıq ödənilmiş 4 226 manatın büdcəyə qaytarılmasını qanuni hesab edib.

2005-ci il parlament seçkilərinin bəzi nəticələri ləğv edilmiş, 2006-cı ildə həmin dairələr üzrə təkrar seçkilər keçirilmişdi.