Azərbaycanın yumurta ixracı 11 ayda 35%-ə yaxın artıb – nazir

2025-ci ilin on bir ayında Azərbaycanın yumurta ixracı 34,9% artaraq 10,6 milyon ABŞ dollarına çatıb. Bunu kənd təsərrüfatı naziri Məcnun Məmmədov bildirib.

Nazirin sözlərinə görə, ölkədə idxal asılılığının əsas səbəbləri əhalinin artımı, məhsuldarlığın aşağı səviyyəsi və kiçik təsərrüfatların emal və bazar imkanlarının məhdudluğu ilə bağlıdır.

Məmmədov qeyd edib ki, dövlət heyvandarlıq sektorunun inkişafı üçün sistemli dəstək tədbirləri həyata keçirir.

2021–2025-ci illərdə 25 615 baş iribuynuzlu və 8 mindən çox xırdabuynuzlu damazlıq heyvanın alınmasına 89,8 milyon manat güzəşt, 10 mindən artıq təsərrüfat subyektinə isə 128 milyon manatdan çox aşağı faizli kredit verilib.

Nazir bu fikirləri dekabrın 17-də keçirilən “Süd və ət istehsalı üzrə mövcud problemlər və qida təhlükəsizliyinə təsirlərin qiymətləndirilməsi” mövzusunda ictimai müzakirə zamanı səsləndirib.

Aytac Zeynalova