Zaur Əliyev : Azərbaycanda heyvandarlıq sektorunda sistemli problemlər qalıb

Azərbaycanda heyvandarlıq sahəsində cins heyvanların azlığı, yem təminatındakı çətinliklər, aşağı məhsuldarlıq və maliyyə resurslarına çıxışın məhdudluğu sektorun inkişafına ciddi maneələr yaradır. Bunu kənd təsərrüfatı nazirinin müşaviri Zaur Əliyev bildirib. 

Onun sözlərinə görə, hazırda ölkə üzrə ümumi heyvan tərkibində cins heyvanların payı cəmi 3 faiz təşkil edir ki, bu da heyvandarlıq məhsullarının istehsalında məhsuldarlığın aşağı səviyyədə qalmasına səbəb olur.

Zaur Əliyev bildirib ki, ətlik istiqamətdə kökəltmə üçün nəzərdə tutulan heyvan materialının sayı illər üzrə azalır. Yerli cinslər üzrə məhsuldarlıq zəifdir və nəticədə heyvanlar aşağı çəki ilə kəsilir. Statistik göstəricilərə əsasən, iri buynuzlu heyvanların orta kəsim çəkisi 150 kiloqram, xırda buynuzlu heyvanların isə 14 kiloqram təşkil edir.

“Heyvanların böyük hissəsi ailə tipli kiçik təsərrüfatlarda saxlanılır ki, bu da istehsalın genişlənməsinə və sənaye əsaslı heyvandarlıq modelinin formalaşmasına mane olur. Eyni zamanda yem təminatında ciddi problemlər mövcuddur və əksər təsərrüfatlarda düzgün yemləmə rasionları tətbiq edilmir”,-o bildirib

Zaur Əliyev qeyd edib ki, heyvanların identifikasiyası və hərəkətinin izlənməsi sahəsində də çatışmazlıqlar var. Bundan başqa, təsərrüfatların dövriyyə və investisiya məqsədilə maliyyə resurslarına çıxışı məhduddur, kiçik təsərrüfatlar üçün aqrar məsləhət və dəstək xidmətləri isə yetərli deyil.

Onun sözlərinə görə, istehsal olunan heyvandarlıq məhsullarının toplanması və emalı prosesində də çətinliklər yaşanır.

Aytac Zeynalova