Qax və Zaqatala fermerlərinə 22 min manatlıq sığorta ödənişi verilib

Azərbaycanın Aqrar Sığorta Fondu (ASF) Qax və Zaqatala rayonlarında fermerlərə 22 min manatdan çox sığorta ödənişi edib. Bu barədə fonddan bildirilib. 

Fondun məlumatına görə, ödənişlər əsasən arpa sahələri və fındıq bağlarında dolu və vəhşi heyvan hücumları nəticəsində yaranmış zərərləri əhatə edib. Sığorta ödənişi alan fermerlər arasında Qaxın Turaclı və Güllük kəndləri, eləcə də Zaqatalanın Ələsgər kəndinin sakinləri var.

Məsələn, 0,7 hektar fındıq bağı sığortalayan Zaqatala sakini vəhşi heyvan hücumu nəticəsində 1 290 manat, 8,4 hektar arpa sahəsini sığortalayan Qax sakini isə doludan dəymiş zərər üzrə 8 808 manat ödəniş alıb.

Aqrar Sığorta Fondunun Şək-Zaqatala regional filialının rəhbəri Toğrul Həşimzadə bildirib ki, qeyri-sabit iqlim şəraiti olan bu zonada aqrar sığorta fermerlər üçün xüsusilə vacibdir. Regionda indiyədək 2,5 milyon manat sığorta ödənişi həyata keçirilib, ölkə üzrə isə ödənişlər 20 milyon manatı keçib.

Fermerlər dövlət dəstəyindən yararlanaraq əkinlərini sığortalamağa və digər həmkarlarını da bunu etməyə çağırıblar. Sığorta mexanizmi 41 müxtəlif bitki növünü, o cümlədən taxıl, bostan, tərəvəz və meyvə bağlarını risklərdən qoruyur.

Gülnar