Əliyev pravoslav xristian icmasını Milad bayramı münasibətilə təbrik edib

Prezident İlham Əliyev Azərbaycanın pravoslav xristian icmasına Milad bayramı münasibətilə təbrik məktubu ünvanlayıb.

Təbrikdə bildirilib ki, Azərbaycanda əsrlər boyu müxtəlif xalqlar və dini etiqadlar arasında qarşılıqlı hörmətə, etimada və qardaşlığa əsaslanan milli-mənəvi həmrəylik mühiti formalaşıb. Prezident vurğulayıb ki, multikultural dəyərlərin və dözümlülük prinsiplərinin təşviqi dövlət siyasətinin prioritet istiqamətlərindəndir.

İlham Əliyev qeyd edib ki, ölkədə dilindən, dinindən və milli mənsubiyyətindən asılı olmayaraq bütün vətəndaşlar, o cümlədən xristian icması üçün etnik-mədəni özünəməxsusluğun qorunması və inkişafı məqsədilə hərtərəfli demokratik-hüquqi şərait yaradılıb.

Dövlət başçısı xristian icmasının ölkənin ictimai-siyasi və sosial-mədəni həyatında fəal iştirak etdiyini, Azərbaycanın tərəqqisi naminə töhfələr verdiyini də xüsusi vurğulayıb.

Təbrik məktubunda Milad bayramının mərhəmət, xeyirxahlıq və yenilik rəmzi olduğu qeyd olunub, xristian icmasına ailə səadəti və rifah arzulanıb.