Azərbaycan "roblox"a rəsmi məktub ünvanlayıb - Ciddi narahatlıqlar var

Süni intellekt və onlayn platformalar uşaqların hüquqları üçün ciddi təhdid yaradır. Bunu İnsan Hüquqları üzrə Müvəkkil (Ombudsman) Səbinə Əliyeva bildirib.

Onun sözlərinə görə, xüsusilə pis vərdişlərin və zərərli alışqanlıqların yayılması mənfi nəticələr doğurur.

Əliyeva qeyd edib ki, “Roblox” oyununa dair hesabat hazırlanıb və bu kimi həsas məsələlərə qarşı ciddi tədbirlər görülməlidir. O əlavə edib ki, müvafiq dövlət qurumları təşəbbüslə çıxış etsələr, Ombudsman dəstək verməyə hazırdır.

Ailə, Qadın və Uşaq Problemləri üzrə Dövlət Komitəsinin sədri Bahar Muradova vurğulayıb ki, Azərbaycanda uşaqların sosial şəbəkələrə girişində təhlükəsizlik təminatı üçün konkret addımlar atılmalıdır. O, bildirib ki, Roblox korporasiyasına məktublar göndərilib və vətəndaşların şəbəkədə davranışı ciddi narahatlıq doğurur.

Dünyada uşaqların onlayn platformalarda və sosial şəbəkələrdə təhlükəsizliyi mühüm insan hüquqları məsələsi hesab edilir. Roblox kimi oyun platformalarında uşaqların zərərli kontentə və sosial manipulyasiyalara məruz qalması halları müşahidə olunur. Azərbaycanda müvafiq qurumlar və Ombudsman bu sahədə təhlükəsizliyi təmin etmək və profilaktik tədbirlər görmək üçün addımlar atır.

Gülnar Nazimqızı