Bakıda yol qəzasında xəsarət alan 10 yaşlı uşağın vəziyyəti stabildir – klinika

Bakının Səbail rayonunda, Azərbaycan prospekti ilə Əhməd Cavad küçəsinin kəsişməsində baş vermiş yol-nəqliyyat hadisəsi zamanı səkidə olarkən üzərinə yol nişanı aşan 10 yaşlı Sərxanın səhhəti stabildir və o, reanimasiya şöbəsindən palataya köçürülüb. Bu barədə Mərkəzi Klinikadan Oxu.Az-ın sorğusuna cavab olaraq məlumat verilib.

Klinikanın açıqlamasına görə, xəstə yeddi gündür ayıq vəziyyətdə müşahidə olunur, şüuru açıqdır, verilən göstərişlərə əməl edir və ətraf mühitlə əlaqəsi mövcuddur. Ona fizioterapiya və reabilitasiya tədbirləri başlanılıb, intensiv terapiya ehtiyacı qalmadığı üçün palataya köçürülüb.

“Palatada reabilitasiya məşqləri davam etdirilir, xəstənin fasilələrlə yeridilməsinə başlanılıb. Reabilitasiya müddəti klinik vəziyyətdən və müalicəyə reaksiyadan asılı olacaq. Proses yaxından izlənilir və uzunmüddətli perspektivdə tam sağalma gözlənilir,” – klinikanın açıqlamasında deyilir.

Bundan əvvəl bəzi media orqanlarında uşağın komadan ayılsa da, heç kimi tanımadığı və bədəninin bəzi hissələrini hərəkət etdirə bilmədiyi iddia edilmişdi.

Hadisə dekabrın 25-də Bakının Azərbaycan prospekti ilə Əhməd Cavad küçəsinin kəsişməsində baş verib. Polis və müvafiq qurumlar qəzanın səbəbləri ilə bağlı araşdırmanı davam etdirir.