Bakının bu qəsəbəsində 1 ay ərzində 65 nəfəri it dişləyib

Balaxanıda 11 saylı mərkəzi poliklinikaya bir ay ərzində sahibsiz itlərin dişləməsi ilə bağlı 65 müraciət daxil olub, lakin vətəndaşlar bələdiyyələrə üz tutsalar da, bu problemin həlli bələdiyyələrin səlahiyyətlərinə daxil deyil. Bunu Milli Məclisin deputatı Arzuxan Əlizadə regional məsələlər komitəsində çıxışı zamanı deyib. 

Deputat bildirib ki, Sabunçu rayonu üzrə fəaliyyət göstərən 4 bələdiyyə ilə mütəmadi əlaqə saxlayır və onların üzləşdiyi sistemli problemlərdən xəbərdardır.

Deputat bildirib ki, Balaxanı bələdiyyəsi xəritələrin olmaması səbəbindən ciddi çətinliklər yaşayır. Onun sözlərinə görə, əraziyə aid evlərə müraciət əsasında, zabrat qaydasında ünvanlar verilir, lakin rəsmi xəritələrin mövcud olmaması idarəetmədə problemlər yaradır.

Əlizadə qeyd edib ki, sənədsiz evlər, məhəllədaxili yolların vəziyyəti, küçələrin işıqlandırılması və sahibsiz itlər bələdiyyələrin əsas problemləri sırasındadır.

Arzuxan Əlizadə vurğulayıb ki, bələdiyyələr yaradılarkən əsasən “torpaq satan orqan” kimi təqdim olunub, bu yanaşma isə bu gün onların real dəstək və icra imkanlarının məhdudlaşmasına, funksional çətinliklərin dərinləşməsinə səbəb olub.

Gülnar Nazimqızı