Deputat: 3–5 min manatlıq subsidiya kəndliyə real fayda vermir

Kəndlilərə verilən 3–5 min manatlıq subsidiyalar real gəlir yaratmır və təsərrüfatların inkişafına töhfə vermir. Bu fikirləri deputat Cavanşir Paşazadə aqrar siyasət komitəsinin iclasında çıxışı zamanı səsləndirib.

Onun sözlərinə görə, mövcud subsidiya mexanizmi kəndlilər üçün davamlı qazanc və bazara çıxış imkanı formalaşdırmır.

Deputat bildirib ki, kənd təsərrüfatı məhsullarının satışı üçün effektiv qiymət mexanizmi mövcud deyil, bu isə fermerlərin zərərə düşməsinə səbəb olur.

“Subsidiya verilir, amma gəlir üçün şərait yaradılmır. Məhsul istehsal olunur, lakin onu sərfəli qiymətə satmaq mümkün deyil. Bu vəziyyət kəndlilər üçün ziyanla nəticələnir”, – Paşazadə qeyd edib.

Deputat alternativ yanaşma kimi kənd təsərrüfatı ərazilərinin mərhələli şəkildə inkişaf etdirilməsini təklif edib. Onun fikrincə, əgər kənd təsərrüfatına yararlı torpaqlar hissə-hissə seçilərək, məsələn, bir bölgəyə təxminən 5 milyard manat vəsait yönəldilsə və həmin bölgəyə 3–4 il vaxt verilsə, nəticələr daha müsbət ola bilər.

Gülnar Nazimqızı