2026-cı ilin birinci yarısında 21 süni intellekt ssenarisi istifadəyə veriləcək - Nazirlik

Azərbaycanda aqrar sahədə süni intellekt texnologiyalarının tətbiqini nəzərdə tutan yeni layihə 33 istifadə ssenarisini əhatə edir. Bu barədə Kənd Təsərrüfatı Nazirliyi tərəfindən hazırlanan təqdimatda qeyd olunub. 

Təqdimatda bildirilib ki, layihə çərçivəsində 21 istifadə ssenarisinin 2026-cı ilin birinci yarısında istifadəyə verilməsi planlaşdırılır.

Qalan 33 ssenarinin isə 2027-ci ilin birinci yarısına qədər mərhələli şəkildə tətbiqi nəzərdə tutulur.

Layihə hazırda bir neçə istiqamətdə məlumatların təqdim olunmasını və analizini təmin edir.

Bunlara bitki növlərinin xəritələşdirilməsi, bitki sağlamlığına nəzarət, torpaq xəritələrinin hazırlanması və fermer reytinqi daxildir.

Bununla yanaşı, sistem bitki məhsuldarlığının proqnozlaşdırılması, suvarmanın təyin olunması və suvarmanın idarə olunması kimi funksiyaları da əhatə edir.

Layihənin əsas məqsədi kənd təsərrüfatında rəqəmsal texnologiyaların tətbiqini genişləndirmək, fermerlərin qərarvermə prosesini dəstəkləmək və məhsuldarlığın artırılmasına töhfə verməkdir.

Gülnar Nazimqızı