Regional bazarlar üçün tətbiqlər istehsal edib satmalıyıq - deputat

Azərbaycanda kənd təsərrüfatında məhsuldarlığın artırılması üçün süni intellekt texnologiyalarından istifadə vacibdir. Bunu deputat Fariz İsmayılzadə bildirib.

O qeyd edib ki, Kənd Təsərrüfatı Nazirliyi sifarişçi rolunu oynayır, lakin bu tətbiqlərin idarə olunmasını özəl sektor həyata keçirməlidir.

İsmayılzadə bildirib ki, ölkədə bu sahədə müəyyən boşluqlar mövcuddur.

 “Dünya üzrə rəqabətqabiliyyətli startaplar və tətbiqlər görməmişəm. Yerli məhsulların inkişafı üçün özəl sektor və təhsil müəssisələri birlikdə çalışmalıdır", - o bildirib.

Deputat vurğulayıb ki, əgər Azərbaycan özəl sektoru layihələr və məhsullar yarada bilsə, bu məhsulları digər ölkələrə ixrac etmək mümkün olacaq. O əlavə edib ki, əsas məqsəd regional bazarlar üçün tətbiqlər və texnoloji həllər istehsal etməkdir.

Gülnar Nazimqızı