Qətldə təqsirləndirilən şəxs Almaniyadan Azərbaycana ekstradisiya ediləcək

Qəsdən adam öldürməkdə təqsirləndirilən Gürcüstan vətəndaşı Elşən Şamilov Almaniyadan Azərbaycana ekstradisiya ediləcək. Bu barədə Baş Prokurorluq məlumat yayıb.

Məlumata görə, Şamilovun ekstradisiyası ilə bağlı Baş Prokurorluğun vəsatəti Almaniyanın səlahiyyətli orqanları tərəfindən təmin edilib.

İstintaq materiallarına əsasən, Elşən Şamilovun Əfqan Əliyev və Hidayət Həsənovla qabaqcadan əlbir olaraq 1993-cü il iyulun 30-da tamah məqsədilə mənzilə basqın etdiyi və bir nəfəri qətlə yetirdiyi şübhəsi müəyyən edilib.

Baş Prokurorluq bildirir ki, onun həmin şəxslərlə müxtəlif vaxtlarda digər cinayətlər törətməsinə də əsaslı şübhələr var.

Şamilov təqsirləndirilən şəxs qismində cəlb olunub. O, istintaqdan yayındığı üçün 2025-ci il mayın 8-də İnterpolun Azərbaycandakı Milli Mərkəzi Bürosu vasitəsilə beynəlxalq axtarışa verilib.
Keçirilən əməliyyat-axtarış tədbirləri nəticəsində Şamilov Almaniyada saxlanılıb.

Hazırda onun Azərbaycana gətirilməsi üçün Ədliyyə Nazirliyinin Penitensiar Xidməti tərəfindən tədbirlər görülür.