Deputat küçə adlarının dəyişdirilməsini və toponim səhvlərinin aradan qaldırılmasını təklif edib

Milli Məclisin deputatı Vasif Qafarov Azərbaycanda sovet dövründən qalan küçə adlarının dəyişdirilməsi və regionlarda toponim səhvlərinin aradan qaldırılması ilə bağlı çağırış edib.

Deputat bildirib ki, milli dəyərlərin qorunması və tarixi ədalətin bərpası baxımından toponimiya siyasəti ardıcıl şəkildə davam etdirilməlidir. Onun sözlərinə görə, xüsusilə Bakı və paytaxtın qəsəbələrində hələ də ideoloji məzmun daşıyan, milli kimliklə uyğunlaşmayan küçə adları qalmaqdadır.

Qafarov qeyd edib ki, bolşevik adlarını daşıyan küçələrin adlarının dəyişdirilərək Azərbaycan tarixini və görkəmli şəxsiyyətlərini əks etdirən adlarla əvəz olunması məqsədəuyğundur. O vurğulayıb ki, bu yanaşma tarixi yaddaşın bərpasına və gələcək nəsillərin milli ruhda formalaşmasına töhfə verə bilər.

Deputat əlavə edib ki, ölkənin bir sıra rayonlarında, o cümlədən Lerik rayonu ərazisində bəzi kənd adları sovet dövründə rus dilində aparılan reyestrlərdə səhv qeydə alınıb. Onun sözlərinə görə, bu səhvlər müstəqillik dövründə də təkrarlandığından bir sıra toponimlər mənasını itirib.

Qafarov yerli qurumları və bələdiyyələri bu yanlışlıqların aradan qaldırılması üçün təşəbbüs göstərməyə çağırıb.

Gülnar Nazimqızı