Odessa yaxınlığında dron hücumuna məruz qalan gəmidə 2 azərbaycanlı dənizçi ölüb

Qara dənizin Odessa limanı yaxınlığında göyərtəsində 4 Azərbaycan vətəndaşının olduğu gəmi dron hücumuna məruz qalıb, nəticədə iki azərbaycanlı dənizçi həlak olub. Bu barədə “Azərbaycan dənizçilərə dəstək” İctimai Birliyindən məlumat verilib.

Bildirilib ki, “Mert Marine Corporation” şirkətinə məxsus, Somali bayrağı altında üzən “TEDY” yedək gəmisi (IMO 9059200) dünən səhər saatlarında dronların hücumuna məruz qalıb. Hücum zamanı gəmidə 4 Azərbaycan, 3 Türkiyə, 2 Almaniya və 1 Ukrayna vətəndaşı olub.

Zədələnən gəmi gecə saatlarında Konstansa limanına doğru hərəkət edərkən daha iki dron hücumuna məruz qalıb. Nəticədə Azərbaycan vətəndaşları Aslan Əliyev və Asim Qasımov həlak olublar.

Digər iki azərbaycanlı dənizçi yanıq xəsarətləri ilə Odessa şəhərində xəstəxanaya yerləşdirilib.

Hadisə Qara dənizdə Rusiya-Ukrayna müharibəsi fonunda mülki və kommersiya gəmilərinin üzləşdiyi təhlükələrdən birini göstərir. Odessa və ətrafındakı liman infrastrukturu müharibə başlayandan bəri dəfələrlə dron və raket hücumlarının hədəfinə çevrilib.