ARGTMŞ Azərbaycanı Bolqarıstanda keçirilən beynəlxalq layihədə təmsil edib

Layihə gənclərin fəallılığını, könüllü fəaliyyət haqqında məlumatlılığını artırmaq, gənclərə könüllülük dəyərlərini mənimsətmək məqsədilə keçirilib.

Layihə çərçivəsində qeyri-formal təhsil metodologiyasına əsaslanan təlimlər gənclərin sosial, kommunikativ və dil bacarıqlarının, eləcə də, mədəniyyətlərarası mühitdə iş üçün səlahiyyətlərinin inkişafı istiqamətində keçirilib. Tədbirdə ARGTMŞ-ın nümayəndə heyəti Azərbaycandakı könüllülük fəaliyyəti ilə bağlı təqdimat edib. İştirakçılar tərəfindən yüksək qiymətləndirilən təqdimatda "Bakı 2015” 1-ci Avropa Oyunları zamanı ölkəmizdəki könüllülük fəlsəfəsi və Azərbaycanda Avropa Könüllülük xidməti əsasında yaradılmış Azərbaycan Könüllülük Xidmətinin fəaliyyəti haqqında danışılıb və iştirakçılara Azərbaycandakı könüllülük hərəkatı əsasında tövsiyyələr verilib. Növbəti günlərdə iştirakçılar Avropa Parlamentinin nümayəndəsi Andrey Novakov ilə keçirilən görüşdə iştirak edib. Görüş zamanı Andrey Novakov öz könüllülük fəaliyyətindən danışıb, uğur hekayəsini iştirakçılar ilə bölüşüb. Sonda, nümayəndə iştirakçıların gənclər siyasəti ilə bağlı suallarını cavablandırıb və gənclər arasında sözügedən mövzuda fikir mübadiləsi aparılıb. Layihə çərçivəsində iştirakçı ölkələr tərəfindən loqalar hazırlanıb və nümayiş olunub. 6 ölkəndən olan nümayəndələrin iştirakı ilə keçirilən səsvermənin nəticəsində Azərbaycan nümayəndələrinin hazırladığı loqo birinci yerə layiq görülüb. Qeyd edək ki, layihənin davamında Azərbaycan nümayəndə heyətinin hazırladı loqonun daimi olaraq istifadə olunması nəzərdə tutulur. Tədbir çərçivəsində həmçinin, mədəniyyət gecəsi keçirilib. Mədəniyyət gecəsi Azərbaycanın milli mətbəxinin və rəqslərinin nümayiş olunması ilə yadda qalıb.