Azərbaycandan İrana müalicəyə gedənlərin kütləviliyi azalıb

"Son vaxtlar İrana müalicəyə gedən xəstələrin kütləviliyi azalıb. Bunun da səbəbi Azərbaycana Avropa ölkələrində və Türkiyədə təhsil almış peşəkar kadrların gəlməsi, ölkəmizə müasir tibbi avadanlıqların gətirilməsi, İranda müalicə qiymətlərinin qalxmasıdır”.

Bunu Modern.az saytına tibb elmləri doktoru, professor Adil Qeybulla deyib.

Onun sözlərinə görə, İranda səhiyyə ocaqları yüksək səviyyədə deyil:

"İranın müalicələri içərisində də problemlər var. Ona görə də insanlar bir daha əmin oldular ki, İranda heç də hər şey yüksək səviyyədə deyil. Çünki bizim xəstələrin böyük əksəriyyəti İranın əyalətlərinə gedir. Ən yaxşı halda isə Təbrizə gedirlər. Təbii ki, İranda səhiyyəni qərb təbabəti hesab eləmək olar. Ona görə Tehranda səhiyyə yüksək səviyyədədir. Amma əyalətlərdə yerləşən səhiyyə ocaqlarında ən köhnə avadanlıqlardan istifadə olunur. İnsanlar da bunların hamısını görüb müasir avadanlıqların İranda deyil Azərbaycanda olduğunu bilirlər.

Son vaxtlar Azərbaycana Avropa ölkələrində və Türkiyədə təhsil almış daha peşəkar kadrlar gəlir. İnsanlar da bunun fərqindədir. Əksər vətəndaşlarımız Azərbaycanda effektiv müalicə ala biləcəklərini bildikləri üçün daha İrana getmirlər”.

Adil Qeybulla Azərbaycanda sığorta təbabətinin olmadığını qeyd edib:

"Bizim ən böyük problemimiz maliyyə ilə bağlıdır. Yəni ölkəmizdə sığorta təbabəti yoxdur. Vətəndaşlar sosial müdafiə elementi olan bu sığortadan bəhrələnə bilmirlər.

Əvvəllər İranda müalicə nisbətən ucuz idi. Son vaxtlar isə İranda da müalicə qiymətləri qaldırılıb. Sanki bizim səviyyəyə çatıb. Ona görə də insanlar artıq ora getməyə heç lüzum görmürlər. Düzdür, yenə də gedənlər var. Amma İrana müalicəyə gedən insanların kütləviliyi azalıb. Həmçinin İranın müalicəsindən narazı qalanlar var. Bu da çox ciddi şəkildə prosesə təsir edir”.