Ceyranbatan su anbarında suyun həcmi artıb

"Hazırda Ceyranbatan su anbarında suyun səviyyəsi 27,49 metr, həcmi isə 171.37 milyon kubmetrdir.  Keçən ilin müvafiq dövründə suyun səviyyəsi 24,64 metr, həcmi isə 135.35 milyon kubmetr olub", - məlumatda bildirilib. 

2024-cü ilin iyununda gölün səviyyəsi 27,87 metr olub.

 

"Yay aylarında suya tələbat çox olduğundan gölün səviyyəsi günə 1 santimetr düşür. Bizim qurğular gölün 18 metr hündürlüyündən suyu götürür. Yay aylarında suyun götürülməsi norma həddindədir. Bu göstəricilər yay ayları üçün normal hesab olunur", xidmət bildirib. 

 

Ceyranbatan su anbarı Bakı və Sumqayıt şəhərlərində içməli və texniki suya tələbatın kəskin artması ilə əlaqədar olaraq 1955-ci ildə yaradılıb. Su anbarının su tutumu 186 mln kubmetr, faydalı həcmi 150 mln. kubmetrdir.  Anbarın uzunluğu 8,74 km, maksimum eni 2,15 km, sahil xəttinin uzunluğu 23,3 km, maksimum dərinliyi 28,5 metr, ölü həcmi səviyyəsində isə 14,5 metrdir, su güzgüsünün sahəsi 1389 hektar təşkil edir.

 

Gölün qidalanma mənbəyi Samurçay, Vəlvələçay və Qudyalçay çaylarından su götürən Samur-Abşeron kanalıdır.

 

Ceyranbatan su anbarı içməli su mənbəyi olduğuna görə, 1960-cı ildə onun ətrafında üç zolaqdan ibarət sanitar-mühafizə zonası yaradılıb. 

 

2001-ci ildə Ceyranbatan su anbarının 1-ci sanitar-mühafizə zonası genişləndirilərək hasara alınıb. 

N.Təbrizli