Koronavirus pandemiyası dövründə bir çox ölkələr daxili bazarlarda ərzaq ehtiyatını artırmaq üçün, ərzaq və kənd təsərrüfatı məhsullarının ixracında məhdudiyyətlər tətbiq edib. Bu da daxili bazarlarının təlabatının əsas hissəsi idxaldan asılı olan ölkələrdə ciddi problemlər yarada bilər. Bu günlərdə Rusiya və Qazaxıstan da un məhsullarının ixracına məhdudiyyət tətbiq edib. Bəs bu əsas idxalçı ölkə kimi Azərbaycanda hansı problemlər yarada bilər? Azərbaycanın ərzaq təhlükəsizliyi hansı səviyyədədir?

Məsələ ilə bağlı, iqtisadçı ekspert Vahid Məhərrəmli ilə danışdıq.




Vahid Məhərrəmov deyir ki, əgər Rusiya və Qazaxıstan kimi Azərbaycanın daha çox idxal əməliyyatı keçirdiyi ölkələr hamısı qərar versə ki, ixraca məhdudiyyət qoysunlar, Azərbaycanda aclıq yarana bilər.

Onun sözlərinə görə, Azərbaycan beynəlxalq normalar çərçivəsinində özünün ərzaq tələbatını heç bir sahə üzrə təmin edə bilmir.

"Azərbaycanda ət norması 76 kq-dır, amma hətta idxal olunan ətlə birlikdə bu 36 kq təmin edilə bilir. Kartofnan bağlı bizim istehsalımız adambaşına 120-125 kq olmalıdır, amma 85-90 kq təmin edilir. Təsəvvür edirsiniz, bu norma heç idxalla da birlikdə ödənmir. Hətta ötən il, idxal olunan kartofun bir hissəsi toxum kimi istifadə olunub, bir hissəsi xarab olduğu üçün atılıb və adambaşına istehlak olunan kartof normanın 55%-i qədər olub”, - deyə Vahid Məhərrəmli bildirib.

Ekspert ümumilikdə əlavə edib ki, bizim ərzaq ehtiyyatımız o qədər deyil ki, bir müddətlik də olsa, əhalinin ərzaq məhsullarına olan təlabatını ödəyə bilək.

Onun sözlərinə görə, əgər idxal zəifləsə və ya dayansa, ölkədə qıtlıq yaranacaq və qiymət artımı olacaq.

"Bu dəqiqə anbarlarda o qədər məhsul yoxdur ki, ölkənin tələbatını bir müddətlik də olsa ödəyə bilsinlər. Beynəlxalq normalar var ki, əgər ölkə özünün daxili təlabatını ödəmək istəyirsə, daxili bazarın ən aşağısı 80%-i yerli istehsal olmalıdır. Odur ki,  idxal zəifləsə, ölkə ciddi problemlər yaşayacaq”, - deyə Vahid Məhərrəmli bildirib.

Həzi




www.anews.az