BP bu il "Şahdəniz" yatağında hasilatı eyni səviyyədə saxlayacaq

"Report" xəbər verir ki, bu barədə BP şirkətinin Azərbaycan, Gürcüstan və Türkiyə üzrə regional prezidenti Qordon Birrell "Natural gas Europe" nəşrinə bildirib.

O qeyd edib ki, 2015-ci ildə yataqdan 10 mlrd. kubmetr qaz və 2,3 mln. ton kondensat hasil edilib: "2016-cı ildə də yataqdan hasilatı eyni yüksək səviyyədə saxlamağı nəzərdə tuturuq. 2015-ci ildə "Şahdəniz" yatağından hasil olunan qaz Azərbaycan, Gürcüstan və Türkiyə bazarlarına çatdırılıb, eyni zamanda "BTC Co." şirkətinə verilib".

Q.Birrell "Azəri-Çıraq-Günəşli" (AÇG) yataqlarından da danışaraq bildirib ki, 2015-ci ildə orta hesabla gündəlik 9 mln. kubmetr səmt qazı SOCAR-a verilib: "Hasil olunan səmt qazının qalan hissəsi isə təzyiqi saxlamaq məqsədilə yenidən kollektora vurulub. Hazırda bizim AÇG-də 6 qaz injektor quyumuz var".

Şirkət rəsmisi AÇG və "Şahdəniz" yataqlarında aparılan qazma işlərindən danışaraq bildirib ki, bu günədək "BP-Azerbaijan" şirkəti 190 quyu qazıb.

Q.Birrell "Şahdəniz" yatağının ikinci mərhələsinin işlənməsi üçün görülən işlərdən də danışaraq qeyd edib ki, layihə çərçivəsində 6 000 metrdən çox dərinlikdə 26 hasilat quyusunun qazılması nəzərdə tutulur və artıq 9 quyu qazılıb.

"Mərhələ 2" çərçivəsində quyulardan ildə 16 mlrd. kubmetr qaz hasil olunacaq ki, bu həcm Türkiyə və Cənub-Şərqi Avropa bazarlarına çatdırılacaq. Cədvələ uyğun olaraq, hədəfimiz ilk qazı 2018-ci ildə Türkiyəyə, 2020-ci ildə isə Avropaya çatdırmaqdır", - deyə regional prezident əlavə edib.