AMEA “Opel” satır – 750 manata

Axar.az xəbər verir ki, Əmlak Məsələləri Dövlət Komitəsi 10 iyul tarixində hərraca çıxarılacaq nəqliyyat vasitələrinin siyahısını təqdim edib.

Hərracda ümumilikdə 11 müxtəlif markalı avtomobil satışa təqdim ediləcək. Onlardan 2-si Mərkəzi Banka, 5-i Nazirlər Kabinetinə məxsusdur. Bundan başqa, hərraca Nəqliyyat, Rabitə və Yüksək Texnologiyalar Nazirliyinin ləğv edilmiş Şuşa Avtonəqliyyat Müəssisəsi, Energetika Nazirliyi, Bakı Şəhər İcra Hakimiyyəti İqtisadiyyat Komitəsi və AMEA-nın "Azərbaycan Ensiklopediyası” Elmi Mərkəzi hərəsi bir avtomobil təqdim edib.

Hərracda ən yüksək qiymətə təqdim edilən avtomobil Nazirlər Kabinetinin balansında olan 2006-cı ilin "BMV 730” markalı avtomobildir ki, onun üçün müəyyən edilən ilkin start qiyməti 20.250 manatdır.

Hərracdakı ən ucuz avtomobil isə AMEA-nın satmaq istədiyi 1992-ci ilin buraxılışı olan "Opel Omeqa” markalı avtomobildir, cəmi 750 manata.

Qeyd edək ki, Bakı Şəhər İcra Hakimiyyətinin avtomobili 2-ci dəfə, Mərkəzi Bankının balansında olan nəqliyyat vasitələri isə 3-cü dəfə 10% endirimlə təkrar hərraca çıxarılıb.