Qonşu ölkədə benzinin qiyməti qalxdı: Kvota tətbiq olunub

ABŞ sanksiyaları İran iqtisadiyyatına zərbə vurmaqda davam edir. Qonşu ölkədə benzinin qiymətini qaldırmaq məcburiyyətində qalıblar.

Bizimyol.info xəbər verir ki, İranda yanacaq satışına da kvota tətbiq olunub. Özəl avtomobil sahibləri ayda cəmi 60 litrə qədər benzin ala biləcəklər. Bir litr benzinin qiyməti 9 sentdən 12,7 sentə qaldırılıb.
Taksi və təcili tibbi yardım maşınları ilə bağlı qərar daha yumşaqdır. Bu avtomobillər üçün 500 litrə qədər benzinin litri 12,7 sentə satılacaq. Kvota keçiləndən sonra bir litr benzinin qiyməti 26 sent olacaq.
Yanacaq kvotası ilk dəfə 12 il əvvəl prezident Mahmud Əhməninejadın vaxtında tətbiq olunmuşdu. Onda xalq dəyişikliyi qəzəblə qarşılamışdı, bir neçə yanacaqdoldurma məntəqəsinə od vurulmuşdu.
ABŞ keçən ilin mayında İrana sanksiyaları bərpa edəndə hadisələrin belə axar alacağı təxmin olunurdu. Bu il qonşu ölkədə yanacaqdoldurma məntəqələrində uzun növbələr müşahidə edilməyə başladı. Kvotanın mayın 2-dən qüvvəyə minəcəyi barədə söz-söhbət çıxmışdı.

www.anews.az