İki ayda Avropaya 2 milyard kubmetrə yaxın qaz ixrac edilib

2025-ci ili yanvar-fevralında Azərbaycandan Avropaya təxminən 1,9 milyard kubmetr qaz ixrac olunub. Bunu energetika naziri Pərviz Şahbazov “X” hesabında yazıb.

Cari ilin iki ayında Türkiyəyə 1,4 milyard kubmetr, Gürcüstana isə 0,5 milyard kubmetr qaz ixrac olunub.

Bu dövr ərzində Trans-Anadolu Qaz Boru Kəməri (TANAP) ilə Türkiyəyə 0,9 milyard kubmetr qaz nəql edilib.

Azərbaycan qazının Avropaya tədarükü Cənub Qaz Dəhlizinin tərkib hissəsi olan Trans-Adriatik Boru Kəməri (TAP) vasitəsilə 2020-ci ilin sonunda başlayıb. Hazırda kəmərin ötürücülük qabiliyyəti ildə 12 milyard kubmetr qaz təşkil edir və 2027-ci ilin sonunadək 20 milyard kubmetrə çatdırılması nəzərdə tutulub.

Aytac