Azərbaycanın xarici borcu ÜDM-in 6,5%-i səviyyəsindədir - Deputat

Azərbaycanın xarici dövlət borcu 5 milyard ABŞ dolları təşkil edir ki, bu da ümumi daxili məhsulun (ÜDM) 6,5%-i səviyyəsindədir. Bunu Milli Məclisin deputatı Azər Əmiraslanov  oktyabrın 22-də İqtisadi siyasət, sənaye və sahibkarlıq komitəsinin elmi-praktim konfransında bildirib.

Deputat qeyd edib ki, ölkənin daxili dövlət borcu isə 17 milyard manat olmaqla ÜDM-in 13,1%-ni təşkil edir.

“Azərbaycanın strateji valyuta ehtiyatları 80 milyard dolları keçib. Bu, ölkənin maliyyə sabitliyinin və iqtisadi təhlükəsizliyinin mühüm göstəricisidir”, – Əmiraslanov vurğulayıb.

Onun sözlərinə görə, iqtisadi müstəqillik yalnız statistik göstəricilər deyil, həm də daxili və xarici risk faktorlarının idarə olunması ilə təmin edilməlidir.

“İqtisadi müstəqilliyi daim möhkəmləndirmək lazımdır. Risk faktorlarını aradan qaldırmaq üçün davamlı islahatlara ehtiyac var”, –  deputat əlavə edib.

Gülnar Nazimqızı