SOCAR-ın Gürcüstana investisiyaları 2,1 milyard dollara çatıb

SOCAR-ın Gürcüstana yatırdığı investisiyaların həcmi 2,1 milyard ABŞ dolları olub. Bu barədə energetika naziri Pərviz Şahbazov “X” sosial şəbəkəsindəki paylaşımında bildirib. 

Nazirin sözlərinə görə, Azərbaycan bu ilin ilk doqquz ayında Gürcüstana 1,5 milyard kubmetr təbii qaz tədarük edib, elektrik enerjisi ixracı 372 milyon kVt/saat təşkil edib. 

Şahbazov Tbilisidə Gürcüstanın iqtisadiyyat və davamlı inkişaf naziri Mariam Kvrivişvili ilə görüşdə iki ölkə arasında strateji enerji tərəfdaşlığının prioritetlərini və yeni layihələrin inkişaf istiqamətlərini müzakirə etdiklərini qeyd edib.

Azərbaycan və Gürcüstan arasında enerji əməkdaşlığı Cənubi Qaz Dəhlizinin əsas hissələrindən biri hesab olunur. Gürcüstan həm Azərbaycan qazının əsas tranzit ölkəsidir, həm də SOCAR-ın uzun illərdir fəaliyyət göstərdiyi əsas xarici bazarlardan biridir. Bu əməkdaşlıq çərçivəsində SOCAR Gürcüstanda qazpaylama şəbəkəsinin genişləndirilməsi, enerji infrastrukturunun modernləşdirilməsi və elektrik ixracı üzrə layihələr həyata keçirir.

Gülnar Nazimqızı