"Bizim Brüsseldəki görüşümüz, həm biz, həm də Azərbaycan bu görüşü keçirməyə hazır olduqlarını bəyan etmişik, o demək olacaq ki, tərəflər sülhə doğru irəliləmək istəyirlər. Bu isə o deməkdir ki, iki-üç ay ərzində sülh müqaviləsinin imzalanması mümkün olacaq", - Paşinyan Ermənistanın ictimai televiziyasına müsahibəsində bildirib.

 

Baş nazir vurğulayıb ki, hazırda Ermənistan və Azərbaycan sərhəddində hər hansı atəşkəs rejimin pozulması faktı qeydə alınmır. 

 

Oktyabrın 10-da Prezident İlham Əliyev Şuşada keçirilən İqtisadi Əməkdaşlıq Təşkilatının Nazirlər Şurasının 27-ci iclasının iştirakçılarına ünvanladığı müraciətdə bildirib ki, Ermənistanın Azərbaycanla sülh müqaviləsi bağlaması üçün tarixi şərait yaranıb. 

 

Azərbaycanla Ermənistan arasında hərbi əməliyyatlar 2020-ci ilin noyabrında üçtərəfli bəyanata əsasən dayandırılıb. Bundan sonra Azərbaycan və Ermənistanın rəhbər şəxsləri sülh imzalanması istiqamətində bir neçə görüşlər həyata keçirib. 

 

Sentyabrın 28-də Qarabağın separatçı rəhbəri Samvel Şahramanyan 2024-cü il yanvarın 1-dən qondarma rejimin ləğv olunması ilə bağlı qərar qəbul edib. 
 
Oktyabrın 5-də Azərbaycan Prezidenti İlham Əliyev oktyabrın 5-də Qranadada Ermənistan, Fransa, Almaniya liderlərinin və Avropa İttifaqı Şurasının rəhbərinin iştirakı ilə keçiriləcək görüşdə iştirakdan imtina edib. Prezidentin xarici məsələlər üzrə köməkçisi Hikmət Hacıyev bildirib ki, Əliyevin görüşdən imtinası Ermənistanla sülh müqaviləsi imzalanması prosesindən imtinası demək deyil. 
 
Sonuncu dəfə Azərbaycan tərəfi Ermənistana sülh sənədinin verilməsini təsdiq edib.  
 
Bundan əvvəl Ermənistanın baş naziri Nikol Paşinyan sonuncu dəfə "France-Press"ə müsahibəsində vurğulayıb ki, sülh müqaviləsi imzalanmayana və bu müqavilə hər iki ölkənin parlamentləri tərəfindən ratifikasiya olunmayana qədər müharibə ehtimalı çox yüksəkdir.

Azərbaycan prezidenti İlham Əliyev isə Şuşada keçirilən sonuncu Qlobal Media Forumda söyləyib ki, bu ilin sonuna kimi Ermənistanla sülh müqaviləsinin imzalanmasını real hesab edir.
 
Gülnar Nazimqızı