Qadın voleybolçular arasında Çempionlar Liqasının “Dördlər finalı”na ev sahibliyi edəcək komandanın adına aydınlıq gəlib. Apasport.az saytının məlumatına görə, qitənin ən nüfuzlu klub turnirinin həlledici qarşılaşması Bakıda keçiriləcək.Bu haqda qərarı Avropa Voleybol Konfederasiyası (CEV) verib. Qurum bu gün Lüksemburqdakı mənzil-qərargahında yarışa ev sahibliyi etmək istəyən klubların sifarişlərini nəzərdən keçirərək, “Rabitə”nin “Dördlər finalı”nın təşkilatçısı olmasını məqsədəuyğun sayıb. Yeri gəlmişkən, Azərbaycan çempionu qrup mərhələsini lider kimi başa vuraraq, pley-offa yüksəlmişdi. Onlar keçirdikləri 6 oyunun hamısını qələbə ilə başa vurmuşdular. “Dördlər finalı”na ev sahibliyi isə komandamızı 1/6 və 1/3 final mərhələsindən azad edib. Onlar yarışda çıxışlarını Bakıda olacaq yarımfinaldan davam etdirəcəklər. Bundan başqa, onların ev sahibliyi “İqtisadçı”nın da pley-offa yolunu açıb. Komandamız ən yaxşı üçüncü yerin sahibi kimi Çempionlar Liqasında oynayacaq. 2012-ci ildə də Azərbaycan paytaxtında təşkil olunan “Dördlər finalı”nın isə bu dəfə “Bakı Kristal Hall”da baş tutacağı gözlənilir. Buna səbəb 2015-ci ildə olacaq I Avropa Oyunlarının voleybol yarışlarının məhz burada keçiriləcəyidir.Qeyd edək ki, 2012-ci ildə ölkəmizdə keçirilən “Dördlər finalı” Bakı təmsilçisi olmadan baş tutmuşdu. Həmin vaxt Türkiyənin “Fənərbaxça” klubu Azərbaycanı kubokla tərk etməyi bacarmışdı.ANN.Az