"Strateji Əməkdaşlıq Şurasında bu günədək gördüyümüz işləri, eləcə də həyata keçirmək niyyətində olduğumuz işləri müzakirə etdik".
"Report"un məlumatına görə, bunu Türkiyə prezidenti Rəcəb Tayyib Ərdoğan Türkiyə-Azərbaycan Yüksək Səviyyəli Strateji Əməkdaşlıq Şurasının VI iclasının nəticələrinə həsr olunmuş mətbuat konfransında bəyan edib.
Ərdoğan Prezident İlham Əliyevi Türkiyədə görməyindən məmnun olduğunu ifadə edərək, prezident seçildikdən sonra ilk xarici səfərini Azərbaycana gerçəkləşdirdiyini də xatırladıb.
O bildirb ki, Türkiyə ilə Azərbaycan arasında ticarət dövriyyəsi son ildə 5 milyard dollar təşkil edib: "Məqsədimiz 2023-cü ilədək bu rəqəmi 15 milyard dolara çatdırmaqdır. Biz əminik ki, tərəflərin bu hədəfə çatmaq istəyi var".
Türkiyə prezidenti əlavə edib ki, Şurada Dağlıq Qarabağ münaqişəsinin tənzimlənməsi məsələsi də müzakirə olunub. O, ATƏT-in Minsk qrupunun fəaliyyətinin ciddi nəticə vermədiyini və münaqişənin hələ də həll olunmadığını vurğulayıb. Türkiyə prezidenti bu məsələdə Azərbaycana dəstək verdiyini bir daha bəyan edib.
R.T.Ərdoğan həmçinin "G-20" sammitinə Türkiyənin ev sahibliyi edəcəyini və bu tədbirə Azərbaycan Prezidentinin də dəvət olunduğunu vurğulayıb.
Türkiyə prezident deyib ki, bu il aprelin 24-də Türkiyədə 1915-ci ildə Çanaqqala zəfərinin 100-cü ildönümü münasibətilə keçirilməsi planlaşdırılan tədbirlərə Azərbaycan Prezidenti İlham Əliyevi də dəvət edib.
Ərdoğan çıxışında TANAP layihəsinə də toxunaraq qeyd edib ki, onun gerçəkləşdirilməsi üçün addımlar atılır: "2015-ci ildə Bakı-Tbilisi-Qars dəmir yolu xətti istismara veriləcək. Bu da Pekindən İstanbula yolun açılması deməkdir".
ANN.Az
Bizi sosial şəbəkələrdə izləyin !
