Qazaxıstan Konstitusiya Şurası "qeyri-ənənəvi cinsi əlaqələri” qadağan edən Rusiya sayağı qanun layihəsini konstitusiyaya uyğun olmayan bilib.
"Uşaqların səhhəti və inkişafına zərər vuran məlumatdan müdafiə olunması haqqında” adlanan qanun layihəsinin müddəalarından biri "qeyri-ənənəvi cinsi oriyentasiya təbliğ edən” məlumat üzərində qadağanı nəzərdə tutur.
Qanun layihəsi bir çox cəhətdən artıq Rusiyada qəbul olunmuş bu kimi qanunvericiliklə eynidir.
Konstitusiya Şurası qənaətə gəlib ki, qanun layihəsi yetərincə dürüst ifadə olunmayıb və bir sıra konstitusiya müddəalarının pozulmasına gətirə bilər. Bundan başqa, Şura qanun layihəsinin qazax və rus dillərindəki mətnlərinin mənaca fərqli olduğunu qərara alıb.
Şuranın qərarı mayın 18-də qəbul olunub, lakin bu barədə bazar ertəsi məlum olub.
Human Rights First Amerika hüquq müdafiə təşkilatı Şura tərəfindən qanun layihəsinin konstitusiyaya zidd tanınmasını alqışlayıb.
MOK Xartiyası
Human Rights First həmçinin qeyd edir ki, qanun layihəsini təcrid etmək qərarı Qazaxıstana 2022-ci il Qış Olimpiya Oyunlarının keçirilməsinə daha inadla iddia etməyə imkan verər.
Human Rights First nümayəndəsi Shawn Gaylord Şuranın bu qərarını "Qazaxıstanda insan haqları uğrunda mübarizədə vacib” adlandırıb.
Təşkilat ABŞ hökumətini "lesbian, gey, biseksual və transgender birliklərinin hüquqlarını məhdudlaşdıran qanun və siyasətlərin yayılması” adlandırılan prosesin Rusiyadan qonşu ölkələrə yayılmasına müqavimət göstərməyə səsləyir.
Daha əvvəl bir çox tanınmış idmançılar, o cümlədən Martina Navratilova, bəyan ediblər ki, ölkədə homofob qanunlar qəbul olunarsa, Qazaxıstan Olimpiadanın ev sahibliyinə iddia edə bilməz.
Onlar Beynəlxalq Olimpiya Komitəsinin (BOK) başçısı Thomas Bach-ı Astananın Beynəlxalq Olimpiya Komitəsinin ayrıseçkiliyə yol verməmək prinsiplərinə əməl etməsi üçün təzyiq göstərməyə çağırıblar.
2014-cü ilin dekabrında BOK Olimpiya Xartiyasına seksual oriyentasiya əsasında ayrıseçkilikdən müdafiə haqqında bənd əlavə edib.
2022-ci ildə Qış Olimpiadasını keçirməyə Almatı və Pekin iddia edirlər.
Oyunların harada keçiriləcəyi iyulun 31-də Malayziyanın paytaxtı Kuala-Lumpurda elan olunacaq.
www.ann.az
Bizi sosial şəbəkələrdə izləyin !
