ABB-nin "Sahibkarlar Klubu”-nun, İqtisadi İslahatların Təhlili və Kommunikasiya Mərkəzinin birgə təşkilatçılığı və "ThinkWise” şirkətinin iştirakı ilə sahibkarlar üçün təlimlər təşkil olunub.
Sahibkarlar ABB-nin Sahibkarlar Klubunun fəaliyyəti, Bankın iş adamlarına təklif etdiyi məhsul və xidmətlərlə tanış olublar. Tədbir iştirakçılarına Azərbaycan sahibkarlarına öz məhsullarını xarici bazarlara çıxarmaq imkanı yaradan Azexport portalının fəaliyyəti haqqında geniş məlumat verilib. Həmçinin Bir Pəncərə İxraca Dəstək Mərkəzinin biznes üçün yaratdığı imkanlar haqqında ətraflı söhbət açılıb. "ThinkWise” şirkətinin təmsilçisi isə iş adamlarını Biznes planının yazılması və investisiya təşviqi sənədinin hazırlanması ilə bağlı məlumatlandırıb.
İqtisadi İslahatların Təhlili və Kommunikasiya Mərkəzinin İcraçı direktoru Vüsal Qasımlı: "2021-ci ilin ilk yarısında Azərbaycanın qeyri-neft ixracında 27,1-%-lik artım müşahidə olunub. Azərbaycanın strateji valyuta ehtiyatları 52 milyard ABŞ dolları, xarici dövlət borcu 8.8 milyard ABŞ dolları təşkil edir. Azərbaycan dünyada strateji valyuta ehtiyatları xarici dövlət borcundan 6 dəfə çox olan nadir ölkələrdəndir. Cari ilin ilk yarısında Azərbaycanda qeyri-neft sənayesinin artımı 16.6%, aqrar sahənin artımı 5.5% təşkil edib.
ABB-nin Korporativ biznes üzrə Baş direktoru Nərgizxanım Biləndərli qeyd edib: "Sahibkar müştərilərimizə faydalı olmaqdan ötrü həyata keçirdiyimiz tədbirlər təkcə bank fəaliyyəti ilə məhdudlaşmır. İş adamlarımızın yeni biznes imkanlarını kəşf etməsi, bu imkanlardan yararlana bilməsi üçün tərəfdaşlarımızla birgə təşəbbüslər formalaşdırırıq. Ümid edirik ki, bu təlimlərimiz də iştirakçılara faydalı olacaq”.
www.anews.az
Bizi sosial şəbəkələrdə izləyin !
