Azərbaycanın dövlət büdcəsi 2025-ci ilin ilk yarısında planı üstələyib

2025-ci ilin yanvar-iyun aylarında Azərbaycan dövlət büdcəsinin gəlirləri 19,8 milyard manat təşkil edib ki, bu da altı aylıq proqnozu 704,8 milyon manat və ya 3,7% üstələyib. Bu barədə Maliyyə Nazirliyindən məlumat verilib. 

Gəlirlərin əsas hissəsi — 8,7 milyard manat — Dövlət Vergi Xidmətinin xətti ilə daxil olub və bu, proqnozdan 5,7% artıqdır. Gömrük rüsumlarından daxilolmalar isə 3,09 milyard manat olub ki, bu da planla müqayisədə cüzi – 0,1% artım deməkdir.

Əmlak Məsələləri Dövlət Xidməti üzrə gəlirlər 21,9 milyon manat təşkil edərək proqnozu 30,3% üstələyib. Dövlət Neft Fondundan transfert tam – 7,24 milyard manat səviyyəsində icra olunub. Sair gəlirlər üzrə isə proqnozdan 3,6 dəfə artıq – 434,6 milyon manat daxilolma qeydə alınıb.

Bununla yanaşı, dövlət müəssisələrinin ödənişli xidmətlərindən daxilolmalar gözləniləndən 21,4% az – 312,1 milyon manat təşkil edib.

Altı ay üzrə büdcə xərcləri isə 17,1 milyard manat səviyyəsində yerinə yetirilib ki, bu da proqnozun 99%-i deməkdir.

Aytac