ANN.Az xəbər verir ki, gömrük komitəsinin sədri gömrük rüsumlarının artıb-azaldılması məsələsinin gündəmdə olmadığını deyib. Onun sözlərinə görə, adətən bu kimi məsələlər dövlət büdcəsinin parlamentdə müzakirəsi zamanı qaldırılır və 2016-cı ilin Dövlət Büdcəsi təsdiq olunduğu üçün bu kimi məsələlər hazırda təhlil obyekti deyil.

Daha sonra avtomobillərin dövlət rüsumu məsələsi ilə bağlı sualları cavablandıran komitə sədri quruma bununla bağlı da çoxlu sayda şikayətlərin daxil olduğunu bildirib: "Amma bu günə qədər nəqliyyat vasitələrinin gömrük rəsmiləşdirilməsi ilə bağlı Dövlət Gömrük Komitəsinə daxil olan şikayətlərin heç biri əsaslı hesab olunmayıb".

O, şikayətlərin araşdırma zamanı əsassız olduğunun üzə çıxdığını deyib: "Şikayət edənlərin əksəriyyəti demir ki, məndən gömrük əməkdaşı artıq pul alır. Deyirlər ki, artıq hesablamalar aparılarkən bu problem üzə çıxır. Biz də izah edirik ki, əvvəllər, yəni köhnə avtomobillər gətirilərkən daha çox bu problemlə rastlaşırdıq". 

A.Əliyev sonda onu da vurğulayıb ki, bu problem ən çox köhnə avtomobillərin gətirilməsi zamanı yaşanır: "Xahiş edirik ki, hesablamlarınızı öncədən düzgün aparasınız. Yəni "Lexus" 2000 dollar, BMW 4000 dollar ola bilməz. Komitənin Avtonəqliyyat Gömrük İdarəsinin əmtəəşünas ekspertləri, o cümlədən Mərkəzi Gömrük Ekspertiza İdarəsinin mütəxəssisləri fəaliyyət göstərir. Bunlar avtomobilə baxaraq qanunvericilikdə nəzərdə tutulmuş qaydada ona qiymət qoyulur. Ondan sonra da rəsmiləşdirilmə aparılır".