Şuşada keçirilən Vaqif Poeziya Günləri başa çatıb

Heydər Əliyev Fondu, Mədəniyyət Nazirliyi və Azərbaycan Yazıçılar Birliyinin birgə təşkilatçılığı ilə keçirilən Vaqif Poeziya Günləri çərçivəsində iyulun 23-də Şuşada, Xan qızı Natəvanın evi qarşısında “Sözün hökmdarı” adlı teatr tamaşası təqdim olunub.

Əməkdar incəsənət xadimi Hafiz Quliyevin quruluş verdiyi səhnə əsərinin ssenari müəllifi şair və yazıçı İlqar Fəhmidir. Tamaşa tarix boyunca hökmranlıq etmiş şəxsiyyətlərin şeirə və sözə münasibətini, həmçinin onların siyasi gücünə baxmayaraq daşıdıqları mənəvi incəlikləri səhnələşdirilmiş süjet xətti ilə çatdırıb.

Tamaşa ilə yanaşı, Şuşanın mədəni ruhu bir daha canlanıb, şeir və qəzəl sədaları Qarabağ səmasında əks-səda verib. Bu il də Vaqif Poeziya Günləri qədim mədəniyyət mərkəzi olan Şuşada xüsusi bədii təqdimatla yekunlaşıb.

Tarixi arayışa görə, Vaqif Poeziya Günlərinin əsası 1982-ci ilin yanvarında, Ümummilli Lider Heydər Əliyevin Şuşaya səfəri zamanı qoyulub. Həmin il Molla Pənah Vaqifin məqbərəsi və Poeziya Evinin təntənəli açılışından sonra tədbir hər il təşkil olunurdu. 1991-ci ilə qədər Qazaxdan başlayıb, Şuşadakı Cıdır düzündə sona çatan Vaqif Poeziya Günləri, şəhərin 2020-ci ildə azad edilməsindən sonra yenidən doğma yurdunda bərpa olunub.

Prezident İlham Əliyevin rəhbərliyi ilə əldə edilən zəfər nəticəsində azad edilən Şuşa bu gün yenidən Azərbaycan ədəbiyyatı və mədəniyyətinin əsas mərkəzlərindən birinə çevrilməkdədir.