"Ermənipərəst müğənni Zara Mqoyanın Bakıda konsert verməsinə münasibətim pisdir. Ümumiyyətlə, istənilən ermənin istər idman, istər mədəniyyət, istərsə də, sülh platforması adı ilə Bakıya dəvət olunmasına münasibətim pisdir. Əgər bu şəkildə sülh bağlanacaqsa, bu da çox pisdir”.

Bunu bizimyol.info-ya açıqlamasında Qarabağ qazisi, Müharibə Veteranı Qadınlarina Sosial Yardım İctimai Birliyinin sədri Rada Abbas bildirib.

Qarabağ qazisi 1905 və 1918-ci illərdə ermənilərin azərbaycanlılara qarşı soyqırımı aktlarını xatarladaraq dedi: "Sonra bizi onlarla barışdırdılar. Biz 70 il onlarla sülh içində yaşadığımızı düşündük. Amma ermənilər yenidən azərbaycanlılara qarşı soyqırım törətdilər.

Keçmişdə də hər şeyin üstündən keçilmişdi deyə biz bu gün acı nəticəni yaşayırıq. Zara dəfələrlə qondarma erməni soyqırımını dəstəkləyən, məlum siyasi baxışı olan və "Anam Ermənistan” deyərək oxuyan Zaranın Bakıya dəvət olunması bizə hörmətsizlik deməkdir”.

Qarabağ qazisi deyib ki, müharibə veteranları Zaranın Bakıya gəlməsinə etiraz edirlər: "Azərbaycan dövlətinin qurulması və ərazi bütövlüyü üçün 30 min şəhid və 50 min azərbaycanlı əlil olub. Biz yalnış etmişik?

Bakıda hazırda minlərlə erməni yaşayır. Biz kimin qarşısını kəsib burda yaşama demişik? Hansı erməniyə gözün üstdə qaşın var deyilib? Zaranın Bakıda konsert verməsi şəhid ailələrinə, Qarabağ əlillərinə, qazilərinə, qaçqın və məcburi köçkünlərə hörtməsizlikdir. Müharibə veteranları buna etiraz edir”.

Xəbər verdiyimiz kimi 26-29 iyul tarixlərində Bakıda "Jara-2018” Beynəlxalq Musiqi Festivalı keçiriləcək. Sözügedən musiqi festivalında isə erməni əsilli müğənni Zara Mgoyanın iştirak etməsi heç də birmənalı qarşılanmayıb. Belə ki, Zara Mgoyanın şəxsi "İnstagram” hesabından qondarma erməni soyqırımı ilə bağlı etdiyi paylaşımı da izləyicilərdə qəzəb doğurub.