Müstəqil Azərbaycanın seçki tarixində müxalifət partiyaları dəfələrlə bir araya gələrək parlament seçkilərində blok şəklində iştirak ediblər. Bəs görəsən müxalifət növbədənkənar parlament seçkilərinə də bloklarla gedə bilərmi?
Müsavat Partiyasının icra aparatının rəhbəri Gülağa Aslanlı Modern.az-a açıqlamasında seçki blokunun yaradılması ilə bağlı heç bir təşəbbüsün olmadığını söyləyib:
"Blok yaratmaq üçün də sənədləşmə işi seçki qanunvericiliyinə görə çox çətin bir prosesdir. Bildirmək istətyirəm ki, son zamanlar bloklaşma işinə qol qoyan partiyalar yoxdur. Eyni zamanda, partiyanın gərək bütün sənədləri yerində olsun. İndiki vəziyyətdə siyası partiyaların seçki blokunun yaradılması haqqında heç bir təşəbbüs yoxdur. Gərək təklif olunsun ki, bununla da bağlı müzakirələr aparılsın”.
Ümid Partiyasının sədri İqbal Ağazadə isə funksional əməkdaşlıq barədə müzakirələrin olduğunu vurğulayıb:
"Ancaq bloklaşma barədə heç bir danışığımız olmayıb. Düşünürəm ki, bloklaşma məsələsi artıq gecdir. Sənədlərini dairə seçki komissiyasına təqdim edən bir siyasi partiyanın kiminləsə bloklaşmaya getməsi absurd bir şeydir”.
Azərbaycan Demokrat Partiyasının sədri Sərdar Cəlaloğlu da hesab edir ki, blokların yaradılması və qeydiyyata alınması çox uzun bir proses tələb edir:
"Blok şəklində seçkiyə getməyin texniki tərəfləri var. Bilirsiniz ki, Azərbaycan müxalifəti seçkidən qabaq dağınıq bir vəziyyətdə idi. Bütün bunları nəzərə alsaq görərik ki, blok şəklində seçkiyə getmək qeyri mümkündür. Ona görə də hər partiya ayrı-ayrı gedəcək. Bütün bunların əvəzinə müxalifətin vahid namizədlik məsələsində razılaşmaq mümkündür. Yəni hər dairədən bir müxalifətin getməsinə nail olmaq olar. Bu zaman digər alternativlər olmaz. Düşünürəm ki, belə olsa müxalifətin seçkilərdə ciddi uğur əldə etməsinə şərait yaradar”.
Klassik Xalq Cəbhəsi Partiyasının sədr müavini Xəzər Teyyublunun sözlərinə görə, blokların yaradılması ilə bağlı müzakirələr aparılmayıb:
"Bilirsiniz ki, müxalifət partiyalarının yarısı getmək, yarısı da qalmaq qərarındadır. Buna görə də vahid mövqe olmadığından, hər bir partiya özünün siyasi fəaliyyətinə uyğun olaraq, yəni seçkiyə münasibətinin fonunda öz qərarlarını çıxarırlar. Gedənlər də arqumentdən çıxış edirlər. Məhz bu baxımdan da partiyalarda vahid mövqe olmadığından, düşünmürəm ki, hər hansı bir blok yaransın. Namizədlərin təbliğat kampaniyası zamanı hər hansı bir seçki pozuntusu olarsa, buna qarşı bir platforma təşkil etmək olar. Yəni bu kimi hallar istisna edilmir. Təbii ki, bu da demokratiyaya aid olan məsələlərdi. Ancaq hələ ki seçki başlamamışdan qabaq belə bir birlik olmayıb”.
www.anews.az
