Ukraynanın "Naftoqaz” şirkəti Azərbaycan qazının Ukrayna ərazisindən Avropaya mümkün tranziti və onun bu ölkənin ərazisində saxlanması ilə bağlı Azərbaycan Dövlət Neft Şirkəti (SOCAR) ilə danışıqlar aparır. Bu barədə Ukrayna mediası "Naftoqaz"-ın rəhbəri Aleksey Çernışova istinadən yazıb.
Onun sözlərinə görə, Kiyev Rusiyanın "Qazprom” şirkəti ilə 2024-cü ilin dekabrın sonunda başa çatacaq və hazırda fəaliyyətdə olan 5 illik tranzit müqaviləsini yeniləmək niyyətində deyil. Nəticədə Ukrayna ərazisindən gündə 42 milyon kubmetr Rusiya qazının nəqli dayandırıla bilər.
Çernışov əlavə edib ki, Azərbaycan qazının Ukrayna ərazisindən tranzitinin mümkünlüyü Bakı ilə müzakirə olunur və SOCAR hasilatçı kimi öz qazını bu məqsədlər üçün təklif edə bilər.
"Biz başqa şirkətlərlə, SOCAR-la danışıqları istisna etmirik. Amma bizim yekun müqavilə qərarlarımız yoxdur. Bizim tərəfimizdən əməkdaşlıq üçün məcburi şərt SOCAR tərəfindən Ukraynanın anbarlarında qazın saxlanmasıdır”, - o, bu məsələnin müzakirə olunduğunu bildirib.
Eyni zamanda Çernışov hesab edir ki, SOCAR Ukraynada nə qədər çox qaz saxlamağa razı olsa, bir o qədər yaxşıdır.
"SOCAR qazı bizdə saxlasa, şad olaram. Anbarlarımız 31 milyard kubmetr həcmində Avropanın ən böyük anbarıdır. Öz ehtiyaclarımız üçün anbarlarının yarısını istifadə edirik. Digər hissə isə gəlir əldə etmək üçün icarəyə verilə bilər”, - o bildirib.
"Naftoqaz”ın rəhbəri tranzit qazının Rusiyaya məxsus ola biləcəyi ilə bağlı suala isə "bu, manipulyasiya və populizmdir. Qaz müəssisələri, xüsusən də iri müəssisələr çox vaxt svop yolu ilə fəaliyyət göstərirlər” cavabını verib.
N.Təbrizli
www.anews.az
Bizi sosial şəbəkələrdə izləyin !
