Bakı Hərbi Məhkəməsində Müdafiə Nazirliyindən 143 milyonun oğurlanması ilə bağlı cinayət işi üzrə növbəti məhkəmə prosesi keçirilib. Müttəhimlər kürsüsündə maliyyə-büdcə idarəsinin keçmiş rəisi, general-mayor Nizami Məmmədov, Hərbi Hava Qüvvələrinin maliyyə xidmətinin keçmiş rəisi, polkovnik Cəlal Kazımov, Quru Qoşunlarının maliyyə idarəsinin keçmiş rəisi Bayram Bayramov, və Hərbi Dəniz Qüvvələrinin maliyyə xidmətinin keçmiş rəisi Vüsal Əlizadə oturub.
Prosesdə Dövlət Təhlükəsizliyi Xidmətinin (DTX) Baş İstintaq İdarəsinin təqdim etdiyi 4 illik maliyyə hesabatı da var.
Hesabata görə, 2016-2019-cu illər ərzində nazirlik tərəfindən həyata keçirilən tədbirlərə 713 min manat vəsait xərclənib. Bunun içində həmçinin 4 il ərzində "Ağ Çiçəyim" mağazalar şəbəkəsindən 60 min manatlıq gül, 14 min manatlıq qapalı məkan üçün bitkilərin alınması kimi faktlar var.
Hesabatda həmçinin yazılıb ki, Azərbaycan Müdafiə Nazirliyinin sabiq Baş Qərargah rəisi general-polkovnik Nəcməddin Sadıkov üçün 21 min manata 6 dəst (cəmi 36 ədəd) çay stəkanı və 8 min manata 80 butulka şərab (hər biri 100 manat) alınıb və dövlət vəsaiti hesabına ödənilib.
Müraciətdə cinayət işi çərçivəsində bir çox şəxslərin adına 1 milyon manatdan yuxarı pulların köçürüldüyü və mənimsənildiyi bildirilib.
Məhkəmə iyulun 19-da davam etdiriləcək.
Nazirlikdən 143 milyonun oğurlanması faktı Dövlət Təhlükəsizliyi Xidməti (DTX) tərəfindən üzə çıxıb. İş üzrə bir sıra müdafiə idarəsinin zabitləri cinayət məsuliyyətinə cəlb edilib.
N.Təbrizli
www.anews.az
Bizi sosial şəbəkələrdə izləyin !
