Sosial media istifadəçilərinin müxtəlif marketlərdə qiymətlərlə bağlı tez-tez statuslar paylaşmaları və rəylər bildirmələri də faktların çoxluğunu təsdiqləyir.
 
Onlardan bəzilərinə diqqət edək:
 
"Mən tez-tez "Rahat" marketdən istifadə edirəm. Kassa qiyməti ilə vitrində olan qiymətlərin fərqli olmasını dəfələrlə görmüşəm. Ötən gün vitrində üstünə 1.09 azn qiyməti yazılan 5 litrlik su aldım. Kassaya yaxınlaşanda həmin suyun qiyməti 2.50 qəpik oldu. Mən bunun niyə belə olduğunu kassirdən soruşanda o bunun səbəbini dəqiq bilmədiyini bildirdi. Adətən belə olduqda məhsul vitrində olan qiymətə satılır. Amma məhsul mənə kassada olan qiymətə satıldı”, - Musazadə yazıb.
 
 
Azad İstehlakçılar Birliyinin sədri Eyyub Hüseynovun sözlərinə görə, bu problemin qarşısını İqtisadiyyat Nazirliyi, eyni zamanda Antiinhisar və İstehlak Bazarına Nəzarət Dövlət Xidməti almalıdır.
 
"Böyük marketlərdə vitrindəki qiymətin kassadakı qiymətə uyğun gəlməməsinə son vaxtlar çox rast gəlinir. Adətən vitrindəki qiymət aşağı, kassadakı qiymət isə yüksək olur. Bu isə süni qiymət artımıdır. Prezident dəfələrlə iqtisadi yığıncaqlarda bildirib ki, ölkədə süni qiymət artımı və monopoliya var. İqtisadiyyat Nazirliyi məhz bu amillərlə mübarizə aparmalıdır. Təəssüf ki, İqtisadiyyat Nazirliyi, Antiinhisar və İstehlak Bazarına Nəzarət Dövlət Xidməti bu vəziyyətin qarşısını ala bilmir. Digər tərəfdən istehlakçıların marketlərdə almadıqları mal üçün pul ödəməsi məsələsi də var. Təxminən ümumi şikayətləri birləşdirsək, bir ildə Azərbaycan vətəndaşları almadıqları mal üçün 500 milyon manat pul ödəyiblər. Belə bir halda istehlakçı malın vitrindəki şəklini, eyni zamanda kassadan aldığı çekin şəklini çəkməli və market sahibinə iradını bildirməlidir. Bunu etdikdən sonra yerindəcə dəyişiklik aparılmalıdır. Əks halda İqtisadiyyat Nazirliyinin 195 telefon nömrəsinə zəng vurub məlumat verilməlidir. Bütün bu işlər ictimai nəzarətin köməyi ilə yığışdırıla bilər. İctimai nazarət isə yalnız kütləvi informasiya vasitələrinin üzərindən getməlidir ki, həmin məsələ ictimailəşərək aradan qaldırılsın”, - Hüseynov bildirib.
"Bunları təsdiqləmək artıq marketin biznes səbətindən asılıdır. Amma bu, yazılı bir qanun deyil. Beynəlxalq şəkildə qəbul olunmuş müştərilərlə davranma etikasıdır. Yəni arada fərq varsa, müştərinin seçim etmək imkanı var. Müştəridən endirimli olmayan qiymət çıxılırsa və o, bundan gec xəbər tutursa, 14 gün ərzində məhsulu geri qaytara bilər. Market ödəməyəndə müştəri əlaqədar qurumlara şikayət edə bilər. Hər şey qanunvericilik çərçivəsində həll olur. Böyük marketlərdə problemin həllinə haradasa nail olmaq mümkündür. Bəzi kiçik, lokal marketlərdə isə belə məqamlarda çətinlik yaşanır. Problemin aradan qaldırılması üçün Antiinhisar Xidməti mütəmadi monitorinq edə, aradakı fərqi üzə çıxara, müəyyən tədbirlər görə, cərimələr tətbiq edə bilər”, - o vurğulayıb.
 
Antiinhisar və İstehlak Bazarına Nəzarət Dövlət Xidmətindən bildirildi ki, sahibkarlıq sahəsində aparılan yoxlamalar 2024-cü ilin yanvarın 1-dək dayandırılıb.
 
"Sahibkarlıq sahəsində aparılan yoxlamaların dayandırılması haqqında” Azərbaycan Respublikasının Qanununa əsasən 2024-cü il yanvarın 1-dək sahibkarlıq subyektlərində yoxlamalar dayandırılıb. Bununla belə, qeyd olunan pozuntu halları ilə əlaqədar Dövlət Xidmətinə istehlakçılar tərəfindən daxil olan müraciətlər əsasında araşdırmalar aparılır və müraciətdə yetərli faktlar olduğu halda, qanunvericiliklə nəzərdə tutulmuş tədbirlər görülür. İstehlakçılar malların üzərində göstərilən qiymətdən fərqli qiymətə satılması halları ilə rastlaşdıqda, bu halı təsdiq edən faktlar və pozuntuya yol vermiş ticarət obyekti barədə dəqiq məlumatları təqdim etməklə Antiinhisar və İstehlak Bazarına Nəzarət Dövlət Xidmətinə müraciət edə bilərlər”.
 
Həmçinin qeyd olunub ki, kassada  ödəniş edərkən istehlakçıdan məhsulun üzərində göstərilən qiymətdən fərqli qiymətlə ödənişin tələb edilməsi istehlakçıların hüquqlarının pozulması hesab olunur.
 
 

www.anews.az