İlham Əliyev: "Azərbaycan-İran münasibətləri ən yüksək səviyyədədir"

 

APA-nın məlumatına görə, sonra səfirlə söhbət edən dövlət başçısı bildirib ki, Azərbaycanla İran arasında münasibətlər ən yüksək səviyyədədir, əlaqələrimiz bütün sahələrdə sürətlə inkişaf edir.

 

Bunun da öz növbəsində hər iki dövlət başçısının niyyətinin göstəricisi olduğunu vurğulayan prezident İran və Azərbaycan prezidentlərinin qarşılıqlı səfərlərinin və bu səfərlər zamanı əldə olunan razılaşmaların önəmini qeyd edib, ölkəmizin İranla dostluq və qardaşlıq münasibətlərinin daha da möhkəmləndirilməsində maraqlı olduğunu deyib.

 

Cavad Cahangirzadəyə ölkəmizdəki diplomatik fəaliyyətində uğurlar arzulayan dövlət başçısı səfirin Azərbaycan-İran ikitərəfli əlaqələrinin daha da inkişaf etdirilməsi istiqamətində səylərini əsirgəməyəcəyinə ümidvar olduğunu bildirib.

 

Öz növbəsində, səfir Cavad Cahangirzadə qeyd edib ki, İran İslam Respublikasının prezidenti Həsən Ruhani prezident İlham Əliyevi özünün ən yaxın dostlarından və qardaşlarından biri hesab edir.

 

Azərbaycanla İran arasında əlaqələrin daha da inkişaf etdirilməsi istiqamətində hər iki ölkənin prezidentinin siyasi iradəsini əsas götürəcəyini deyən Cavad Cahangirzadə bunun üçün ölkəmizdəki diplomatik fəaliyyəti dövründə səylərini əsirgəməyəcəyini, bu baxımdan prezident İlham Əliyevin hərtərəfli dəstəyinə ümidvar olduğunu bildirib.

 

Görüşdə ikitərəfli əməkdaşlıq əlaqələrinin müxtəlif sahələrdə, xüsusən təhlükəsizlik, nəqliyyat, infrastruktur layihələri, kənd təsərrüfatı, turizm kimi sahələrdə daha da genişləndirilməsi ilə bağlı məsələlər müzakirə olunub.