Günel Səfərova yüksək VƏZİFƏYƏ SEÇİLDİ

Tanınmış hüquqşünas Günel Səfərova "Vətəndaş” İctimai Birliyinin 5 il müddətinə sədri seçilib. Birlik Azərbaycan Respublikasının Ədliyyə Nazirliyində dövlət qeydiyyatına alınıb.

Xəbəri Axar.az-a təsdiq edən Günel Səfərova bildirib ki, rəhbərlik etdiyi təşkilatın əsas məqsədi demokratik dəyərlərin yayılmasına, ictimai həyatın müxtəlif sahələrində vətəndaş təşəbbüskarlığının artmasına, ictimai rəyin formalaşmasına, elmi və praktiki tədqiqatların, monitorinqlərin, sorğuların həyata keçirilməsinə yardım etmək, cəmiyyətin sosial, iqtisadi və mədəni-humanitar inkişafına töhfə verməkdən ibarətdir.

Günel Səfərova qeyd edib ki, təşkilatın əsas vəzifələri müxtəlif problemləri tədqiq etmək yolu ilə onun həllinə ictimai diqqəti cəlb etmək, cəmiyyəti narahat edən məsələlərin həllinə yardım üçün vətəndaş cəmiyyəti, media və dövlət qurumlarının birgə fəaliyyətinə nail olmaq, sosial, ictimai-siyasi, iqtisadi, təhsil, səhiyyə, idman, elm və texnologiya, media, hüquq, ekoloji, aqrar, mədəni-humanitar və digər sahələrdə geniş spektrli tədqiqatlar aparmaq, demokratik proseslər sahəsində tədqiqatları, fikir plüralizminin dərinləşməsini və sosial cəhətdən əhəmiyyətli olan təşəbbüsləri müdafiə etmək, insan hüquq və azadlıqları üzrə maarifləndirmə və monitorinqin aparılması, korrupsiyaya qarşı mübarizədə ictimaiyyəti maarifləndirməklə səfərbər etmək, miqrasiya və demoqrafiya proseslərini öyrənmək, qaçqın və məcburi köçkünlərin, müxtəlif aztəminatlı əhali qruplarının problemlərini araşdırmaq, gənclərin intellektual inkişafını və innovativ təşəbbüslərini təşviq etmək, ailə, qadın və uşaqların sosial və mənəvi inkişafına dair araşdırmalar aparmaq, onlara sosial, mənəvi, hüquqi və psixoloji yardım göstərmək, gender bərabərliyini araşdırmaq və təbliğ etmək; mədəni və etnik müxtəlifliyin, milli-mənəvi və dini dəyərlərin qorunmasını təşviq etmək və Dayanıqlı İnkişaf Məqsədlərinə nail olmaq üçün təbliğat kampaniyasına dəstək verməkdir.

G.Səfərova vurğulayıb ki, Nizamnamə ilə nəzərdə tutulmuş vəzifələri həyata keşirmək üçün Birlik araşdırmalar, monitorinqlər aparacaq, hər növ sosioloji sorğular keçirəcək, sosial iş və korporativ sosial məsuliyyət layihələrini həyata keçirəcək.